Конфликтот на Блискиот Исток влегува во нова, поопасна фаза, со засилена реторика, директни воени удари и контрадикторни дипломатски сигнали. Иран упатува остри предупредувања за одмазда, Израел ја проширува воената операција, а меѓународната заедница се обидува да спречи поширока регионална ескалација.
Во исто време, паралелно со воените дејства се води и дипломатска битка – Техеран категорично негира преговори со САД, додека Вашингтон тврди дека разговорите продолжуваат. На терен, бројките растат – стотици напади, илјадници жртви и над милион раселени, што ја прави кризата една од најсериозните во последните години.
Остра порака од Техеран: „Ќе возвратиме повеќекратно“
Претседателот на иранскиот парламент, Мохамед Бакер Калибаф, упати остро предупредување до противниците на Иран, обвинувајќи ги дека своите „желби“ ги претставуваат како вести, додека истовремено ѝ се закануваат на земјата. Калибаф порача дека секој напад ќе наиде на повеќекратно посилен одговор.
Во објава на платформата X, Калибаф ваквите постапки ги нарече „голема грешка“ и предупреди дека Иран, „ако непријателот удри еднаш, ќе возврати повеќекратно“. Тој додаде дека иранскиот народ, под водство на врховниот лидер, ќе го натера „непријателот да зажали за својата агресија“ и „успешно ќе ги врати своите права“.
Иран: Нема преговори додека трае војната
Иран повторно демантира дека води преговори со Соединетите Американски Држави, порачувајќи дека такви разговори нема да има додека трае американската воена агресија. Портпаролот на иранското Министерство за надворешни работи, Есмаеил Багаеи, објави дека Техеран и Вашингтон не преговарале од почетокот на војната.
Во објава на социјалната мрежа X, Багаеи ја појасни ситуацијата: „Во изминатите триесет и еден ден не сме воделе никакви преговори со Америка. Она што се случи беше американско барање за преговори, проследено со низа предлози кои до нас стигнаа преку одредени посредници, вклучително и Пакистан“.
„Нашиот став е многу јасен. Додека американската воена агресија и инвазија траат со полн интензитет, сите наши напори и капацитети се насочени кон одбрана на иранската суштина. Претходните искуства ги почувствувавме на сопствена кожа и не ја забораваме издајата нанесена врз дипломатијата во два наврата за помалку од една година“, додаде иранскиот портпарол.
Белата куќа: Разговорите сепак продолжуваат
Изјавите од Техеран се во спротивност со тврдењата на Белата куќа. Портпаролката Каролин Ливит инсистира дека разговорите се одвиваат.
„Преостанатите елементи на иранскиот режим се желни да го прекинат уништувањето и да седнат на преговарачка маса додека сè уште можат“, изјави Ливит, додавајќи дека, и покрај „јавниот став“ на иранскиот режим и „лажното известување“ на медиумите, разговорите меѓу САД и Иран „продолжуваат и добро напредуваат“.
Израел ја проширува офанзивата во Либан и Иран
Во меѓувреме, Израелските одбранбени сили (IDF) наредија евакуација на жителите на уште шест села во јужен Либан, како дел од проширувањето на воената операција. Пораката беше упатена до жителите на селата Залаја, Лбаја, Јахмар, Сахмар, Калаја и Далафи, со повик веднаш да се преместат северно од градот Карауна во долината Бекаа. Израел предупреди дека секое движење кон југ може да ги загрози животите на цивилите. Поради нападите врз Бејрут и јужен Либан, раселени се повеќе од еден милион луѓе, а досега се убиени повеќе од 1200 лица, меѓу кои и над 120 деца.
Израелските сили во исто време објавија дека во рок од 24 часа погодиле 170 цели во Иран, вклучувајќи постројки за производство на компоненти за оружје и мотори за беспилотни летала, како и клучни командни центри на западот од земјата. Меѓу погодените објекти се и полициска станица во Санандаџ и комплекс на милицијата Басидж во Дехголан.
Жртви, разурнувања и растечка хуманитарна криза
Паралелно, Израел изврши нов воздушен удар врз долината Вади ал-Хуџеир во јужен Либан. Според податоците на либанските власти, од почетокот на израелската офанзива во март, во судирите со Хезболах загинале повеќе од 1200 луѓе. Либанската војска соопшти дека еден војник е убиен, а петмина се ранети во директен израелски напад врз контролна точка во областа Тир.
Франција побара итно свикување на седница на Советот за безбедност на Обединетите нации поради „исклучително сериозни инциденти“ насочени кон мировните сили. Повикот следува откако оваа недела беа убиени најмалку тројца мировници, меѓу кои и еден од Индонезија. Францускиот министер за надворешни работи, Жан-Ноел Баро, порача дека нападите во близина на позиции на ОН се неприфатливи и побара целосна истрага. Од почетокот на конфликтот, според официјалните податоци, убиени се најмалку 1247 лица, а 3680 се ранети.
Ракети, експлозии и посреднички обиди
Во текот на ноќта, Израел објави дека ирански ракети се движат кон неговата територија и дека одбранбените системи се активирани. Во исто време, иранските медиуми известуваат за силни експлозии во Техеран и во соседниот град Караџ.
Во обид за смирување на ситуацијата, Пакистан посредува меѓу САД и Иран, пренесувајќи пораки и организирајќи контакти со регионални сили како Саудиска Арабија, Турција и Египет, со цел да се намалат тензиите.
Редакција Фронтлајн
