Портпаролката на СДСМ и членка на Извршниот одбор, Богданка Кузеска, на денешната прес-конференција упати сериозни обвинувања за постоење на организирана прекугранична мрежа за медиумска контрола, црни кампањи и политичка манипулација. Според неа, истиот авторитарен модел кој со години се применува во Македонија од страна на ВМРО-ДПМНЕ, е тесно поврзан со центри на моќ во Унгарија, Србија и Словенија, со цел одржување на власт преку страв и анти-ЕУ пропаганда.
Кузеска истакна дека најновиот скандал со лажни вести за наводни „експлозиви во Кањижа“ е директен производ на оваа мрежа. Повикувајќи се на истражувачките извештаи на OCCRP и BIRN, таа посочи дека унгарскиот бизнисмен Петер Шац, близок соработник на Виктор Орбан, преку своите компании CHS Invest и Target Media Group контролира дури 40 проценти од медиумскиот простор во Македонија. Овие медиуми, според Кузеска, се ставени во целосна служба на ВМРО-ДПМНЕ и нивните бизнис интереси.
Понатаму во своето излагање, портпаролката на СДСМ повлече паралела со регионалните сојузници на ВМРО-ДПМНЕ. Таа нагласи дека истата структура преку Шац ги контролираше медиумите во Словенија кои ја поддржуваа партијата на Јанез Јанша, користејќи дури и израелски фирми за приватно разузнавање како Black Cube за ширење лажни скандали. Во овој контекст беше споменат и Александар Вучиќ како дел од истата „авторитарна оска“ која користи методи на false-flag операции за создавање паника и евентуално одлагање на избори, како што е моменталниот случај во Унгарија.
Според социјалдемократите, Орбан, Јанша, Вучиќ и Мицкоски не се случајни сојузници, туку лидери кои го применуваат принципот на купување медиуми преку прокси компании за пласирање лажни афери и непријателство кон Европската Унија. Кузеска порача дека на граѓаните сега им е јасно како овој модел работи против нивните интереси и за сметка на странски авторитарни центри.
Како одговор на овие сознанија, СДСМ упати неколку итни барања до надлежните институции. Партијата бара Агенцијата за аудио и аудиовизуелни медиумски услуги (АВМУ) да започне истрага за финансирањето и уредувачката политика на медиумите поврзани со мрежата на Орбан во Македонија. Исто така, се повикуваат европските институции да го испитаат ова прекугранично мешање во внатрешните работи на земјите од Западен Балкан и итно да се прекине секакво странско влијание врз домашниот информативен простор. На крајот, Кузеска заклучи дека Македонија заслужува слободни медиуми и демократска влада која работи исклучиво за граѓаните.
