Премиерот Христијан Мицкоски денеска ја презентираше рамката на новото законско решение за високото образование, оценувајќи го како клучен системски чекор кој треба да стави крај на долгогодишните импровизации и експерименти во овој сектор, соопштуваат од Владата.
Според премиерот, досегашните решенија донесени во 2018 година предизвикале сериозни штети, намалувајќи ја научната продукција и квалитетот на наставата, поради што е неопходна суштинска трансформација.
Мицкоски нагласи дека новиот закон е плод на вистинско партнерство со академската заедница и широка дебата со универзитетите, експертите и студентите. Една од клучните новини е креирањето услови за задржување на младиот кадар во земјава. За прв пат, најдобрите студенти кои завршиле на првите 100 светски универзитети со државни стипендии, како и најуспешните дипломци од домашните универзитети, ќе имаат приоритет при вработување на државните високообразовни установи.
Владата, според Мицкоски, воведува и целосно нов модел на финансирање на универзитетите, каде распределбата на средствата ќе се врши врз основа на постигнатите резултати и вложениот труд. Мицкоски информираше дека овогодинешниот буџет за универзитетите е значително зголемен и изнесува 7,5 милијарди денари, најавувајќи дека овој тренд на зголемување ќе продолжи и во наредните години.
Тој истакнува Главниот фокус на реформите ќе биде ставен на јакнење на научната дејност, зголемување на цитираноста на македонските професори и подобрување на меѓународната видливост на домашните високообразовни центри. Крајната цел е македонските универзитети повторно да станат конкурентни во регионот и значително да го подобрат својот пласман на престижната Шангајска ранг-листа.
Премиерот упати сериозно предупредување дека доколку не се понуди квалитет, државата ќе продолжи масовно да ги губи младите генерации кои во моментов често избираат да студираат на универзитетите во соседните земји. Тој истакна дека ова не е само политичко, туку суштинско државно прашање кое ја одредува иднината на татковината.
Мицкоски ја повика целата академска заедница да се вклучи и да додаде вредност во овој процес, нагласувајќи дека Владата ќе се бори за иднина исполнета со просперитет, наспроти, како што рече, опозициските структури кои сакаат враќање кон времињата на криминал и неквалитет. „Или ќе ја работиме работата како што треба или подобро воопшто да не ја работиме. Јас ќе се борам да имаме многу поголема иднина,“ порача претседателот на Владата.
