Американскиот претседател Доналд Трамп повторно предизвика бурни реакции во јавноста откако на својата социјална мрежа „Truth Social“ сподели илустрација на која е прикажан во прегратка со Исус Христос. Овој потег доаѓа во екот на острата дипломатска и теолошка војна меѓу неговата администрација и папата Лео, кој е првиот американски папа во историјата и жесток критичар на војната против Иран.
Сликата го прикажува Трамп со затворени очи како се допира со челото до Исус, стоејќи зад микрофон со американското знаме во позадина. Трамп ја проследи објавата со коментар дека „лудаците од радикалната левица можеби нема да го сакаат ова“, но дека нему му изгледа убаво. Претходно неделава, претседателот избриша слична објава каде беше претставен како фигура налик на Исус, што предизвика бран критики дури и кај дел од неговите поддржувачи.
Конфликтот меѓу Белата куќа и Ватикан дополнително се заостри по изјавите на потпретседателот Џеј Ди Венс, кој јавно го повика папата да биде внимателен кога зборува за теолошки прашања. Венс реагираше на пораката на папата дека следбениците на Христос никогаш не се на страната на оние што фрлаат бомби, на што администрацијата на Трамп одговори со потсетување на доктрината за „праведна војна“. Трамп, пак, преку социјалните мрежи порача дека некој треба да го информира папата за убиствата на демонстранти во Иран и за опасноста од иранската нуклеарна бомба, пренесува Ројтерс.
Од своја страна, папата Лео од Алжир порача дека нема страв од администрацијата на Трамп и дека ќе продолжи да ги осудува „неоколонијалните“ сили кои го кршат меѓународното право. Поддршка за папата пристигна и од моќната католичка организација „Витези на Колумбо“, од каде нагласија дека неговите зборови не се политички поени, туку одраз на Евангелието. Наспроти нив, спикерот на Конгресот, Мајк Џонсон, застана во одбрана на Трамп, велејќи дека критиките кон папата се очекувани кога тој навлегува во „политички води“.
