Комисијата за култура на СДСМ упати остри критики по повод одбележувањето на јубилејот „80 години Драмски театар“, оценувајќи дека наместо празник на уметноста, настанот се претворил во политички скандал. Според опозициската партија, власта ја ставила политиката пред достоинството на вметниците, претворајќи ја прославата во партиски собир на кој немало место за оние кои со децении ја градат оваа институција.
„Зошто министерот во својата матична институција се опкружил со партиски луѓе наместо со колегите со кои до вчера делел сцена? Од што стравува министерот, па нема храброст да се појави пред своите колеги, уметниците?“, прашуваат од Комисијата за култура на СДСМ. Тие потенцираат дека е недозволиво актерите и техничкиот персонал да бидат маргинализирани на сопствениот јубилеј.
Во соопштението се изнесуваат сериозни сомнежи за начинот на кој биле распределени местата во салата. Од СДСМ прашуваат дали е точно дека вработените биле однапред предупредени дека нема да добијат билети бидејќи седиштата биле резервирани за политички гости и нивното обезбедување. Според партијата, ваквиот пристап не е организациски пропуст, туку намерна политичка одлука на директорот на театарот и ресорниот министер.
„Особено загрижува фактот што обезбедувањето на политичките гости не е дел од вработените во театарот, а сепак им се дава предност пред луѓето кои со децении ја градат оваа институција“, реагираат од СДСМ. Тие додаваат дека кога вработените не можат да го одбележат празникот во својата матична куќа, се фрла тешка сенка врз интегритетот на самата институција.
Комисијата за култура потсетува дека театарот треба да остане простор на слободната мисла и дека тој не му припаѓа на ниту еден политички субјект. Според нив, стравот на министерот да се соочи со своите колеги-актери е показател за погрешните политики што се водат во секторот култура.
„Театарот им припаѓа на актерите, на публиката и на слободната мисла. А кога министерот ќе почне да се плаши од актерите, тогаш проблемот не е во театарот, туку во политиката што ја води“, заклучуваат од СДСМ. Опозицијата смета дека овој настан, наместо да донесе „светлина на сцената“, претставува уште еден пример за партизација на културните установи.
Фотографии од настанот објавени од министерот за култура и туризам, Зоран Љутков, објавени на фејсбук страницата од Министерот, тука.
