Пратеничката група на СДСМ денеска поднесе предлог-закон за измени на Законот за Влада по скратена постапка, со кој се бара забраната за поседување двојно државјанство да се однесува на сите министри, вицепремиери и целиот состав на Владата. Клучниот дел од ова барање е овие законски решенија да стапат на сила веднаш, со цел да се воспостави јасен принцип кој ќе важи за сите избрани и именувани функционери без исклучок.
Од партијата нагласуваат дека ваквиот чекор е одговор на најавените измени на Законот за пратеници од страна на власта, кои СДСМ ги квалификува како „уште една измама“. Според опозицијата, предлогот на ВМРО-ДПМНЕ е манипулативен бидејќи предвидува измените да важат дури од наредниот парламентарен состав, а не и за актуелните носители на функции.
СДСМ во своето соопштение директно обвинува дека целта на предлогот на власта е да се заштитат сегашните пратеници и министри од редовите на мнозинството кои поседуваат и други државјанства. Според партијата, таквото постапување е нечесно, лицемерно и во спротивност со принципите на еднаквост и одговорност пред граѓаните.
„Очигледно е дека целта е да се заштитат актуелните пратеници и министри на ВМРО-ДПМНЕ кои имаат и други државјанства. Ова е нечесно, лицемерно и спротивно на принципите на еднаквост и одговорност“, стои во партиското соопштение. Социјалдемократите најавуваат дека покрај новиот Закон за влада, ќе поднесат и амандмани на предлогот на ВМРО-ДПМНЕ со кои ќе бараат правилата да важат веднаш за сите.
Опозициската партија инсистира на итно спроведување на овие мерки за да се разобличи, како што велат, манипулацијата на власта. Нивниот став е дециден дека ниту еден пратеник, ниту избран или именуван функционер не смее да има двојно државјанство додека е на функција.
„СДСМ ја разобличува оваа манипулација и презема конкретни чекори, освен Законот за влада ќе поднесеме и амандмани на предлогот на ВМРО да важи веднаш. Двојно државјанство нема да има пратеник ниту избран и именуван функционер, и тоа да важи веднаш“, заклучуваат од Центарот за комуникации на СДСМ.
