Сојузот на синдикатите на Македонија (ССМ), во соработка со Фондацијата „Фридрих Еберт“ – Скопје (ФЕС), ја организираше петтата по ред Синдикална академија. Овогодинешното издание има посебно значење бидејќи е дел од програмата за одбележување на големиот јубилеј – 80 години од основањето на ССМ и осум децении континуирана синдикална борба во Македонија.
На дводневниот настан учествуваа синдикални претставници, активисти и правни застапници од сите гранкови синдикати на ССМ. Главниот фокус беше ставен на едукацијата и јакнењето на капацитетите за заштита на работничките права, особено во период на зголемени притисоци врз синдикалното движење и борбата за повисоки плати.
Под водство на проф. д-р Александар Ристовски од Правниот факултет „Јустинијан Први“, учесниците поминаа низ интензивни сесии посветени на слободата на синдикално здружување, механизмите за успешно колективно договарање и законските претпоставки за организирање штрајк. Преку работа во групи и споделување лични искуства, синдикалците ги анализираа предностите и слабостите во досегашното дејствување во јавниот и приватниот сектор.
На отворањето, претседателот на ССМ, Слободан Трендафилов, потпретседателот за приватен сектор, Иван Пешевски, и менаџерот на програми во ФЕС, Валон Садики, порачаа дека само преку масовно членство и активна вклученост може да се изградат моќни синдикати кои ќе бидат рамноправни социјални партнери во државата.
Од ССМ нагласуваат дека оваа едукација е од пресудно значење во мигови кога синдикатот води интензивна битка за зголемување на минималната плата и заштита на животниот стандард. Тие предупредуваат дека колективните договори се под постојан удар од креаторите на политиките, а социјалниот дијалог во државата во моментов не ги дава посакуваните резултати.
„Само здружени работници ќе дадат посилни синдикати, а силните синдикати ни се особено потребни сега. Водиме борба не само за плати, туку и за зачувување на колективните договори и достоинството на трудот“, велат од ССМ.
Присутните синдикалци ја истакнаа потребата од креативни решенија за привлекување ново членство и проширување на синдикалните организации, што треба да ја зацврсти улогата на ССМ како заштитник на работниците на сите нивоа. Синдикалната борба, како што порачаа, продолжува со уште поголем интензитет.
