Премиерот Христијан Мицкоски на денешното обраќање пред Комитетот за јавни инвестиции порача дека со формирањето на ова тело државата воспоставува нов, поцврст и поодговорен механизам за одлучување. Тој нагласи дека одлуките повеќе нема да се водат од импровизации, туку исклучиво од јасни критериуми, визија и стратегија, соопштија од Владата.
Премиерот изјави дека ова претставува суштинска промена во начинот на градење на иднината, потенцирајќи дека јавните инвестиции не се само бројки на хартија, туку патишта, училишта, болници и енергетски капацитети кои ја гарантираат стабилноста. Целта, како што истакна Мицкоски, е секој буџетски денар да биде насочен кон создавање најголема вредност, економски раст и отворање работни места, порачувајќи дека времето на стихијно планирање е завршено и доаѓа време на систем и одговорност.
На состанокот беше разгледана листа на проектни идеи кои веќе добиле позитивно мислење од Министерството за финансии за преминување во следната фаза. Мицкоски наброја проекти во транспортот поврзани со Коридорите 8 и 10 и модернизација на железницата, завршување на објектите на ФИНКИ и Универзитетот „Мајка Тереза“ во образованието, како и инвестиции во регионалните клинички болници во Тетово, Штип и Кичево. Тој ги наведе и проектите за владин податочен центар во делот на дигитализацијата, ревитализацијата на водните ресурси преку системите Злетовица и Стрежево, и зајакнувањето на енергетската независност преку нови капацитети и обновливи извори на АД ЕСМ.
Според премиерот, задачата на Комитетот не е само формалност, туку претставува вистински филтер за квалитет од чија работа ќе зависи утврдувањето на првата Конечна приоритетна листа на јавни инвестиции. Мицкоски заклучи дека Владата ги поставила темелите и дека е време Македонија да гради паметно, да инвестира стратешки и да испорачува конкретни резултати за граѓаните преку рамномерен развој.
