Во рамките на третото издание на манифестацијата „Денови на поезијата“, во организација на фондацијата „Ацо Шопов – Поезија“, вечерва ќе се одржи ексклузивен концерт на музичко-поетскиот проект „Поетроника“. Настанот ќе се реализира во третата сала на киното „Синеплекс“.
Насловен „Кон Ацо Шопов“, овој перформанс претставува современ музичко-поетски омаж посветен на творештвото на еден од најголемите македонски поети. Зад проектот стојат актерот Оливер Митковски и музичкиот продуцент Андреја Салпе, кои преку уникатна синергија на електронскиот звук и моќниот поетски збор ќе ѝ понудат на публиката едно поинакво, модерно доживување на поезијата на Шопов.
Влезот за вечерашниот концерт е слободен. Заинтересираните посетители можат да ги подигнат своите бесплатни билети на Инфопултот во Скопје Сити Мол.
„Поетроника“ е автентичен македонски проект кој континуирано ја истражува врската меѓу домашната поезија и современата електронска музика, бришејќи ги границите меѓу класичното рецитирање и клупскиот звук.
Нивниот досегашен опус бележи повеќе значајни изданија, меѓу кои музиката за театарската претстава „Марта Верина“, истоимениот албум „Поетроника“, како и бројни настапи во живо и концерти на различни културни манифестации.
