Фудбалската репрезентација на Португалија го објави официјалниот список на играчи кои ќе патуваат на Светското првенство во 2026 година. Селекторот Роберто Мартинез повика 27 фудбалери, предводени од Кристијано Роналдо кој ќе испише историја со својот шести настап на Мундијалите. Но, она што го одбележа овој настан беше длабоко емотивниот потег на националниот тим – списокот официјално брои „27+1“ играч.
Тоа едно, посебно и вечно место му припадна на Диого Жота. Иако физички нема да биде присутен, Португалија се погрижи тој симболично да биде со тимот на секој чекор од патот на овој шампионат.
Поранешниот напаѓач на Ливерпул и стандарден португалски репрезентативец трагично го загуби животот на 28-годишна возраст во сообраќајна несреќа во Шпанија во јули 2025 година. Неговата смрт го шокираше светскиот фудбал, а репрезентацијата одлучи неговиот дух да продолжи да живее преку овој тим.
„Конечниот список вклучува 27 имиња, плус едно,“ изјави селекторот Мартинез на официјалната прес-конференција. „Загубата на Диого беше незаборавен и многу тежок момент за сите нас. Но, уште следниот ден наша одговорност стана да се бориме за неговиот сон и за примерот што тој го остави во нашата репрезентација. Неговиот дух, сила и пример се тој ‘плус еден’ и тој засекогаш ќе биде со нас.“
Овој гест е направен во чест на неговото семејство, неговите соиграчи, целата нација и вечната „21-ка“, осигурувајќи дека споменот за Диого Жота ќе биде движечка сила за Португалија на најголемата фудбалска сцена.
Ј. Ѓ.
