Социјалдемократскиот сојуз на Македонија (СДСМ) преку писмено соопштение упати остри критики до премиерот Христијан Мицкоски и јавниот обвинител Ненад Савески, обвинувајќи за директна политичка контрола врз правосудните органи. Од опозициската партија бараат државниот обвинител уште денеска да си поднесе оставка.
Според СДСМ, премиерот Мицкоски постојано му диктира задачи и му дава насоки на Савески, користејќи ја дури и говорницата за време на државни празници. Ваквата реакција на опозицијата следи по последната изјава на премиерот во која тој јавно порача дека „трпението му е при крај“ во однос на испораката на правдата од страна на обвинителството.
„Има ли некого во земјата повеќе што не му е јасно дека судството и обвинителството во Македонија се под целосна контрола на Мицкоски и неговата организирана криминална група? Затоа нема правда во Македонија, затоа нема реформи, затоа сме заглавени и со блокиран европски пат“, се наведува во партиското соопштение.
Од партијата тврдат дека актуелната власт свесно не ги спроведува реформите бидејќи, како што велат, Мицкоски не сака независно судство ниту Европско јавно обвинителство, бидејќи тоа би значело крај на заштитата за инволвираните во криминал.
„Откако Мицкоски си го избра на функцијата, Савески е цело време на линија со него и работи по неговите нарачки. Мицкоски дава наредби – Савески исполнува“, обвинуваат од СДСМ, заклучувајќи дека по ваквите јавни изјави на премиерот, оставката на обвинителот е најмалото нешто што тој треба да го направи.
