Андони Ираола и официјално е потврден за нов главен тренер на фудбалскиот клуб Ливерпул, откако потпиша двегодишен договор. Четириесет и тригодишниот Шпански стратег пристигнува на „Енфилд“ по импресивни три години поминати на клупата на Борнмут, предводејќи го клубот од јужниот брег до прв пласман во европските купови во неговата историја.
Ираола експресно изби како главен фаворит за позицијата по саботниот отказ на Арне Слот. Клучна улога во неговото ангажирање имаше спортскиот директор на Ливерпул, Ричард Хјуз, кој претходно го назначи Шпанецот и за шеф на стручниот штаб во Борнмут. Преговорите се водеа во текот на викендот кога беше постигнат и дефинитивниот договор, по што Ираола во четвртокот допатува во Мерсисајд за да го стави својот потпис на соработката.
Возбуда за новото поглавје на „Енфилд“
Откако ги заврши медиумските обврски за клупската телевизија и првпат во новата улога го посети стадионот „Енфилд“, тој и официјално беше претставен пред јавноста.
„Ливерпул е голем клуб, масивен клуб, еден од најголемите во светот. Но, чувствувајќи го одвнатре и разбирајќи го малку повеќе, секогаш мислев дека е посебен клуб. Не ви требаат многу нешта за да ве привлече Ливерпул. Ливерпул е Ливерпул. Секако, атмосферата, навивачите, клубот, играчите, шансата за мене да тренирам играчи од врвно ниво и можноста да се борам за титули – мислам дека не може да биде попривлечно од ова. Тешко е да се најде нешто слично, па затоа сум навистина возбуден што започнувам“, изјави Ираола за официјалната веб-страница на клубот.
Се очекува во неговиот нов стручен штаб на „Енфилд“ да се приклучат и неговите досегашни колеги од Борнмут: Томи Елфик, Шон Купер, Пабло де ла Торе и Том Вебер.
Стил на игра по вкусот на навивачите
Стилот на игра на Ираола важи за многу поблизок до она што навивачите на Ливерпул го очекуваат од тимот – висок пресинг и голема енергија, карактеристики кои се многу послични на ерата на Јирген Клоп. Поранешниот фудбалер на Атлетик Билбао во својата тренерска кариера претходно ги предводеше и екипите на АЕК Ларнака, Мирандес и Рајо Валјекано, пред да се пресели во Премиер лигата во 2023 година.
Ираола, исто како и Слот и Клоп пред него, претпочита варијација на формацијата 4-3-3, во која главно се стреми да го наруши противникот со брзи крилни напаѓачи и агресивен притисок кога тимот ја нема топката во свој посед. Оваа тактика се покажа како исклучително успешна во Борнмут, со кој минатата сезона заврши на шестото место во Премиер лигата и обезбеди директно учество во Лига Европа за првпат во клупската историја.
Новиот предводник ќе ја започне работата во тренинг центарот „АХА“ на почетокот на јули со стартот на претсезонските подготовки, додека неговиот прв натпревар на „Енфилд“ е закажан за 9 август, во пријателска средба против екипата на Монако.
