Еден од најкултните филмови во современата македонска кинематографија, „Џган“, по сценарио и во режија на Вардан Тозија, годинава одбележува една деценија од својата светска премиера на фестивалот во Чикаго. По тој повод, како што соопштуваат од продукцијата, на 25 август (вторник) ќе се одржи јубилејна проекција на „Rooftop Open Air Cinema“ на отворената катна гаража во Скопје Сити Мол, со почеток во 20:30 часот.
Според најавите од организаторите, веднаш по проекцијата ќе биде организирана интерактивна сесија и разговор меѓу филмската екипа и публиката, проследено со дружење во чест на јубилејот. Продуцентот на филмот, Огнен Антов од „Дрим Фектори“, истакнува дека приказната не застарела во ниту еден кадар и сè уште предизвикува силни емоции.
„Кога денес го гледам „Џган“, не гледам филм од пред 10 години, туку приказна која не застарела во ниту еден кадар. Најголемата награда за мене не е онаа од фестивалите, туку кога млад филмаџија ќе ми каже дека токму „Џган“ му бил инспирација. Затоа и после 10 години сакам новите генерации да го видат и да доживеат дека филмот сè уште удира силно. Некои филмови стареат. Овој филм мислам дека само чека публиката повторно да го открие“, посочува Антов во писменото соопштение.
Приказната на филмот, создадена под максимата „Никој не е роден насилен“, следи низа свирепи околности кои едно тивко и повлечено момче го претвораат во суров водач на група отфрлени штитеници од дом за деца без родители. Главните улоги ги толкуваат Мартин Ѓоргоски, Дениз Абдула и Никола Ристановски. Како што е наведено во најавата, зад филмот стои искусна екипа, меѓу кои директорот на фотографија Владимир Самоиловски, монтажерот Атанас Ѓеоргиев, дизајнерот на звук Игор Поповски и сценографот Кирил Спасески. Македонски продуцент е „Дрим Фектори“, во копродукција со „Red helicopter films“ од Албанија.
Во изминатата деценија филмот ги обиколи светските фестивали и освои повеќе значајни признанија, потсетуваат од екипата. Меѓу нив се издвојуваат Специјалната награда на жирито за актерска изведба за Мартин Ѓоргоски на фестивалот во Брауншвајг, како и наградата FIPRESCI на PRIFEST во Приштина. Филмот беше овенчан и со Големата награда (Grand Prix) за најдобар долгометражен филм на фестивалите во Кицбил и Отранто, додека Ѓоргоски доби признание за најдобар актер и на фестивалот во Лесковац.
Од организацијата информираат дека билетите за јубилејната проекција се веќе пуштени во продажба на билетарницата на киното „Синеплекс“, како и преку нивната официјална веб-страница.
