СДСМ преку портпаролката Богданка Кузеска денеска пред Јавното обвинителство побара итно отворање на истрага за трошењето на 5,5 милиони евра преку Државната лотарија за прославата на Денот на независноста. Од партијата обвинуваат дека од граѓаните се крие вистината, како и целосната документација, одлуките и фактурите за настанот на кој, меѓу другите, настапи и светскиот диџеј Дејвид Гета.
Кузеска го проблематизираше начинот на кој е донесена одлуката, прашувајќи врз која законска основа Владата ѝ наложила на Државната лотарија да ја финансира прославата и кој орган одобрил трошење на над 300 милиони денари без соодветна одлука на Собранието на акционери. Според СДСМ, јавниот повик траел само пет работни дена и на него пристигнала само една понуда. Дополнителен сомнеж, според опозицијата, фрла фактот што повикот завршил на 8 мај, а само три дена подоцна веќе бил најавен настапот на Гета, што за СДСМ е доказ дека условите биле однапред приспособени за конкретен организатор.
Од СДСМ инсистираат Обвинителството да утврди колку чинел настапот на Дејвид Гета, кои странски и домашни фирми добиле пари и како се вршеле исплатите кон компанијата организатор доколку нејзината сметка била блокирана. Истовремено, се бара одговор каде завршиле приближно 1,75 милиони денари од продадените билети. Покрај до Обвинителството, партијата упати повик за итна реакција и до Државната комисија за спречување на корупцијата (ДКСК) и до Државниот завод за ревизија, со цел да се утврди каде завршил секој денар од потрошените 5,5 милиони евра кои власта првично тврдеше дека ќе чинат нула денари.
