Софија има предлози поврзани со железници, автопати и инвестиции на бугарски компании во Северна Македонија. Планот се однесува и на отворање кампуси на бугарските универзитети во Северна Македонија, а исто така се вклучени и учебниците по историја… „Еуроактив“, повикувајќи се на дипломатски извори, јавува за вакви детали од акцискиот план за спроведување на Договорот за добрососедство, подготвен од бугарска страна.
Треба да бидат презентирани и македонските предлози по сектори, иако документот за практична примена на Договорот за добрососедството допрва треба да биде одобрен од двете земји, појаснуваат изворите на „Еуроактив“.
„Предложениот акциски план е првиот конструктивен чин на властите во Софија откако вицепремиерот Красимир Каракачанов во септември објави дека ќе биде блокирана европската перспектива на Северна Македонија“, пишува „Еуроактив“.
Софија предложи акциски план за соработка со Северна Македонија во спроведувањето на Договорот за пријателство, добрососедство и соработка, соопшти Министерството за надворешни работи на Бугарија по средбата на заменик-министерот за надворешни работи Екатерина Захариева во Софија со специјалниот пратеник на Северна Македонија, Владо Бучковски.
Овој документ, кој ги засега сите секторски министерства, се очекува да биде потпишан на претстојниот состанок на Заедничката меѓувладина комисија.
„За време на состанокот беа разменети идеи за продолжување на процесот за враќање на довербата меѓу двете земји. Беше направен преглед на спроведувањето голем број практични обврски за кои нашата земја смета дека се одложени“, се вели во бугарското соопштение.
Извор: 360 степени
