Пописот ни е повеќе од потебен и треба да се спроведе час поскоро, рече министерот за правда Бојан Маричиќ попладнево, по тридневната расправа по Предлог-законот за попис на населението, по кој по 19 години земјава, оваа годинава треба да ја изврши оваа статистичка операција. По Предлог – законот ќе се гласа на продолжение на оваа седница, кое ќе биде дополнително закажано.
– Пописот ќе влее доверба кај сите граѓани и наместо да повикувате на кочници, треба заедно да излеземе и заедно да ги повикаме граѓаните да се попишат. Вашата кампања може да има ефект само да има помалку попишани граѓани или само помалку Македонци во проценти. Ако тоа ви е целта, некави служи на чест. Бојкотот и блокадите не се решение. Граѓаните сакаат да видат функционалност на институциите, а не бескрајни политички говори. Во однос на одлагањето, знаеме дека ќе се случат пописи и во Романија и во Србија и во други држави, особено во оние земји во кои нема да се прават теренски активности. Меѓутоа препораката на Евростат за одлагање е тој да се одложи во текот на 2021 година, а не наредната година. Врзаниот потпис тоа повеќе гледајте го како еден вид на гаранција отколку како на било што друго, рече Маричиќ.
Во обраќањето пред завршувањето на расправата, министерот за правда Бојан Маричиќ истакна дека државата и системот се подготвени за попис, бидејќи, како што рече, речиси 20 години таква операција не е спроведена, а е од исклучителна важност за развојот на државата. Доказ за подготвеноста рече, е и извештајот на Европската Комисија, во кој се нотирал добар напредок, особено во спроведувањето на пилот фазата од пописот на населението, како и тестирањето на новата методологија.
-Комисијата смета и дека има подобрувања во сите статистички области и усогласување на секторските статистики со стандардите на ЕУ. По ова, сомнежи за тоа како ќе се спроведе пописот има само уште кај опозицијата, која бара начин тој да биде одложен. Најавата дека ќе се собираат потписи да се спречи одржувањето на пописот е само продолжение на напорите да се опструира развојот на државата, а повикот за бојкот е бизарен. Не може да се бојкотира нешто што е обврска, рече Маричиќ.
Тој ги отфрли обвинувањата на опозицијата дека насила се „турка“ попис, а тие како политички субјект биле игнорирани од власта по ова прашање.
-Сакам да ве потсетам дека разговорите со опозицијата за пописот започнаа уште во 2019 година. Токму ВМРО-ДПМНЕ реши да се повлече од нив. Последните предлози кои ги добивме, за кои беше информирана и јавноста или беа небулозни или беа непотребни и неостварливи во вакви кратки временски рокови. Да имаше барем еден конструктивен предлог, за кои статистичарите, односно Државниот завод за статистка ќе кажеше дека е добар, ние ќе го прифатевме и ќе го вметнеме во текстот на законот. За жал таков не добивме, рече министерот.
Едно од барањата рече, било и барањето повтoрно да има Државна пописна комисија, што, според него, е политичко тело и една од причините зошто пропаднало попишувањето во 2011.
-Сепак, добивме креативни идеи како да се блокира целиот процес … најверојатно да не испадне дека оваа Влада е способна да направи нешто што на нив не им успеа, а тоа е да организира модерна статистичка операција по сите највисоки светски и стандарди на ЕУРОСТАТ. Многу пати имам досега кажано дека пописот неместо тешко политичко прашање, треба да биде стручна статистичка операција. Гледам опозицијата овие денови ја преземаа истата терминологија и наратив, но едно од вашите барања колеги беше повтoрно да има Државна пописна комисија, што е политичко тело и една од причините зошто пропадна попишувањето во 2011. Велите политиката надвор од пописот, ама политичко тело да учествува во спроведувањето на истиот, рече Маричиќ.