Британско-шведската компанија „АстраЗенека“ соопшти дека се елиминирани повеќето проблеми во фабриките за производство на вакцината против Ковид-19 во Европа. Генералниот директор Паскал Сорио изјави дека компанијата сега ќе се фокусира на зголемување на производството за Европската унија.
Ова е трета вакцина против коронавирусот што Европската комисија ја одобри на заедничкиот пазар по оние на Фајзер/БиоНТек и на Модерна.
Одлуката доаѓа по одобрувањето кое претходно го даде Европската агенција за лекови (ЕМА).
Препораката на ЕМА се заснова врз податоци дека вакцината обезбедува заштита од коронавирус и гарантира безбедност, изјави генералната директорка на Агенцијата, Емери Кук. Таа увери дека ваквиот вид на вакцини е полесен за транспорт и складирање.
– Дозволете ми да нагласам дека нашата работа не застанува тука. Безбедноста и ефикасноста на оваа вакцина ќе продолжи внимателно да се набљудува за време на нејзиното распоредување во земјите-членки и на глобално ниво. Исто така, внимателно ги следиме мутациите на коронавирусот низ светот и како тие влијаат врз заштитата од вакцините. Сè уште не знаеме дали вакцината на АстраЗенека обезбедува заштита од нив, но побаравме од компанијата да го испита ова, како што сторивме со производителите на другите вакцини, наведува Кук.
За да биде навистина ефикасна, вакцината на АстраЗенека треба да се прими двапати во период помеѓу четири и 12 недели, изјави Бруно Сепоидс, заменик-претседател на ЕМА. Тој додаде дека моментно Агенцијата е во контакт со производителот на руската вакцина „Спутник V“ и разгледува различни податоци со цел да се утврди дали може да добие одобрение за европскиот пазар.
