Од предвидените четири предмети, да се полагаат само двата екстерни, додека за интерните предмети да се впише просечната оценка од четиригодишното школување или да се полагаат два екстерни предмета и два интерни, но во скратен обем.
Две опции се наоѓаат пред матурантите кои под водство на Сојузот на студентите до понеделникот ја бојкотираа наставата со барање државната матура годинава да не се полага како досега.
Првата опција е, од предвидените четири предмети, да ги полагаат само двата екстерни, додека за интерните предмети да им биде впишана просечната оценка од четиригодишното школување.
Другата опција е да се полагаат два екстерни предмета како што бараат матурантите, и два интерни, но во скратен обем, согласно скратената настава поради ковид- кризата, неможноста соодветно да се следат предавањата и поради оскудните техничките услови на дел од нив, како што велат средношколците.
Ова денеска го соопшти пратеничката од ЛДП, Моника Зајкова, на дебатата што ја организираше парламентарниот Клуб на младински политики каде беа презентирани овие две решенија.
Тие сега во писмено образложена форма ќе бидат пратени и до Министерството за образование и наука и Владата, а Зајкова се надева на позитивен одговор.
Според неа, ова е пример за компромисно решавање на општествените проблеми, кога во Собранието се слушнал гласот на средношколците, а низ дебатата се наметнало оптимално решение за кое се надева дека ќе биде прифатливо за учениците, за Сојузот на средношколците, за МОН и за Владата.
Претседателот на Сојузот на средношколците Бленди Ходаи изјави дека за нив е прифатлива првата опција, но конечна одлука ќе донесат по состанокот со членството.
Во понеделникот, Сојузот го прекина привремено бојкотот во очекување одлука во Собранието каде што е доставен Предлог-закон за изменување и дополнување на Законот за средно образование, а во вторникот на нивно барање имаа средба со премиерот Зоран Заев на која разговараа за измени на концептот на државната матура.
