Главниот американски експерт за заразни болести, д-р Ентони Фаучи, за израелскиот весник „Тајмс од Израел“ ја опиша дистрибуцијата на вакцините во Израел како „пример за остатокот од светот“.
-Јас го користам Израел како пример за тоа што може да се случи кога ефикасно вакцинирате значителен дел од луѓето, рече Фаучи, директор на Националниот институт за алергија и заразни болести во САД.
Во Израел, околу 4,2 милиони граѓани ја примија првата доза на вакцината, а 2,8 милиони ги примија и двете.
Фаучи процени дека еврејската држава има предност во однос на САД затоа што е многу помала и добро организирана, додека во неговата земја дистрибуцијата на вакцината се разликува од сојузна држава до сојузна држава.
Неодамнешните чекори преземени од администрацијата на американскиот претседател Џо Бајден за формирање центри за вакцинација, со дистрибуција на вакцините во аптеките, помогнаа имунизацијата да се врати на вистинскиот пат.
Запрашан да ја искоментира неодамнешната изјава на израелскиот премиер Бенјамин Нетанјаху дека земјата „ќе заврши со Ковид-19“ доколку преостанатите 570.000 Израелци над 50 години примат вакцини, Фаучи одговори дека треба да се биде внимателен.
-Мислам дека тоа ќе биде огромна предност, бидејќи оттогаш ќе бидете во добра форма, но доколку целиот свет нема пристап до имунизацијата и не се вакцинира, секогаш ќе постои закана од појава на нова мутација на вирусот и да се наруши заштитата на вакцината, рече Фаучи. /МИА/
