Министерството за внатрешни работи ја објави потерницата која е распишана за Сашо Мијалков. Станува збор за национална потерница. Неговиот братучед и поранешен премиер Никола Груевски, кој доби азил во Унгарија се бара со меѓународна потерница.
„Мијалков Сашо, од татко Јордан , мајка Милка, роден на 15.09.1965 во Скопје, со живеалиште на ул.Народен Фронт бр.5-31 во Скопје, се бара по наредба за распишување на потерница на Основен суд Скопје 1 КОК – КР бр.56/21, а врз основа на решение на судот со кое му е определена мерка куќен притвор, поради постоење на основано сомневање дека сторил кривично дело – „Злоупотреба на службената положба и овластување“ од чл. 353 , кривично дело „Злосторничко здружување “ од член 394 и кривично дело „Примање награда за противзаконито влијание“ по член 359 од КЗ“, пишува во потерницата.
Утрово од МВР за ФРОНТЛАЈН потврдија дека потерницата е веќе распишана.
„Распишана е национална потерница. Бидејќи од досега преземените мерки и активности лицето не е пронајдено, ќе го известиме судот и ќе побараме да биде издадена наредба за распишување на меѓународна потерница“, се вели во одговорот на МВР за Фронтлајн.
Пресудата за случајот „Таргет-тврдина“ е закажана за 26. февруари. Мијалков е осомничен за нелегално прислушување, а Обвинителството пред неколу дена ги искажа завршните зборови. Обвинети се 12 лица, а Мијалков е првообвинет. Тој е обвинет за злосторничко здружување, злоупотреба на службената положба и за примање награда за противзаконито влијание, од кои последното му застарува на крајот на февруари.
Обвинителството на рочиштето соопшти дека Мијалков од канцеларија вршел нелегално прислушување, а неговата одбрана ги отфрли обвинувањата.
Премиерот Заев утрово изјави дека е разочаран, но очекува исчезнатиот да биде пронајден и да се соочи со правдата.
„Јас се надевам дека ќе биде исправен пред правдата, односно ќе биде пронајден. Во спротивно, секој што згрешил, ќе одговара. Не знам, БЈБ, АНБ, министерот, па дури и премиерот. Или доколку постои одговорност, ќе се бара и од судот, од обвинителството…. Барам институциите да постапат согласно законот. Убеден сум дека тоа може да се спроведе. Очекувам детални информации и детали и истрага за самиот случај. Нашиот народ очекува расветлување оваа ситуација. Ќе побараме одговорност кога ќе ги знаеме деталите“, рече Заев.
Заев рече дека доколку не се расветсли состојбата, ќе побара одговорност.
И. Т. З.
