Процедурата за именување амбасадори од моментот на предлагање од страна на министерот за надворешни работи преку процесот на координација со Владата и со претседателот на државата, па се до добивање агреман од државата каде што се патува, е дискретен процес, што е во рамки на класифицираните информации во државата и затоа МНР никогаш се нема произнесено за било кој кандидат доколку во било која фаза на именување се до добивање на агреман.
Ова денеска го изјави шефот на дипломатијата Бујар Османи, во одговор на новинарско прашање да даде коментар за информациите во медиумите за именувањето на Љубомир Фрчкоски за амбасадор во САД.
-Ние коментираме само за имиња на амбасадори откако се добиваат агремани. Така што во ниту еден момент Министерството за надворешни работи нема споменато дека има таков кандидат или нема, или се повлекува…Од почетокот, до крајот, тоа се информации што се провејуваат низ медиумите. Во ниту еден момент ниту сме потврдиле, ниту сме демантирале. Додека не добиете официјално информација од МНР, сметајте ги како неофицијални информации, подвлече Османи.
Во однос на честитките што Фрчкоски ги добивал на социјалните мрежи за назначувањето за амбасадор, Османи вели „ние не одговараме за честитките по социјалните мрежи на ниту еден граѓанин на Северна Македонија“.
Во врска, пак, со именувањето на Андреј Жерновски за кандидат за амбасадор во седиштето на ОН во Њујорк, Османи вели дека и тоа е шпекулација.
-Во врска со именувањето на Жерновски, тоа е исто така прашање што произлезе од медиумите и во Министерството за надворешни работи тоа прашање не е отворено и не е разговарано, дециден е Османи.
Во однос на амбасадорското место во Софија, шефот на дипломатијата вели дека таа Амбасада треба да се пополни што побрзо, и оти веќе се во разговори со претседателот на државата и со премиерот, за да најдеме соодветен кандидат за Софија.
И премиерот Зоран Заев денеска не сакаше да ги коментира пишувањата во дел од медиумите за Љубомир Фрчкоски за амбасадор во Вашингтон. Одговарајќи на новинарски прашања, Заев рече дека ниту Владата, ниту било која институција коментира амбасадори додека не завршат постапките.
извор: МИА
