Општина Аеродром во соработка со „Нула отпад“ и „Капитол мол“ почна кампања за изработка на екомаски од електричен отпад.
Во изборот на најдобра екомаска може да учествуваат сите деца од градинките и училиштата од Општина Аеродром.
„Задача на учесниците е да изработат индивидуална креативна маска во која ќе вклучат најмалку три стари и неисправни електронски и електрични уреди или стари и потрошени батерии. Фотографија од направената екомаска треба да се испрати во директна порака на фејсбук-профилот на „Капитол мол“, заедно со уредно пополнета и потпишана пријава од родител/старател најдоцна до 1 април 2021 до 16 часот.“, велат од Општина Аеродром.
За најдобрите три маски „Нула отпад“ обезбеди награди. Прва награда „канон“ фотоапарат, втора награда паметен часовник и трета награда за најлајкувана фотографија на социјалните мрежи на „Капитол мол“ (Фејсбук и Инстаграм) – гејмерски сет (слушалки, тастатура и глувче).
За категоријата најлајкувана фотографија важечки ќе бидат гласовите од објавата на фотографијата до 3 април – 12 часот.
Добитниците на наградите ќе бидат објавени на 5 април во 12 часот.
Целта на оваа активност е подигнување на свеста за селекција и рециклирање на опасниот отпад, како и заштита на животната средина, наведуваат од Општина Аеродром.
