Словачката претседателка Зузана Капутова денеска ја прифати оставката на конзервативниот популистички премиер Игор Матович, јави ДПА.
Веднаш потоа, таа и официјално мандатот за формирање на новата влада му го даде на досегашниот министер за финансии, Едуард Хегер.
Матович во неделата ја најави оставката на функцијата шеф на четирипартиската словачка Влада под притисок на неговите коалициски партнери и притоа го предложи Хегер за негов наследник.
Хегер (44), експерт за маркетинг, припаѓа на конзервативното христијанско крило на движењето на Матович – Обични луѓе и независни личности (ОЛАНО).
За разлика од поларизирачкиот Матович, тој се смета за консензуален политичар, а сите четири досегашни коалициски партнери веќе му ветија поддршка, пренесе ДПА.
Коалициските партии, исто така, прифатија Матович да стане министер за финансии и објавија дека, со малку исклучоци, сакаат повторно да ги номинираат истите луѓе во владата.
Меѓутоа, денеска беше изненадување што за неколку часа се одложи претходно најавениот утрински состанокот меѓу Капутова, Матович и Хегер. И иако Хегер првично најави дека на претседатечката ќе и достави готов список со министри, тоа не се случи и имињата не беа објавени.
Претседателската канцеларија само објави дека Капутова и Хегер разговарале за составот на новата влада и дека јавноста ќе биде информирана за тоа „што е можно поскоро“. /МИА/
