Во издание на „Сигмапрес“ од Скопје од печат излезе „Митот алатка во политиката“, најновата книга на политикологот и дипломат Виктор Габер. Ова е негова дванаесетта книга од областа на дипломатијата, политичка историја и политичката социологија.
Книгата е резултат на еден сеопфатен напор на авторот, насочен кон рефлексија за суштината, формите и користењето на митовите во процесот на донесување на одлуки што се значајни за едно општество/држава од страна на избраните или со сила наметнати одлучувачки субјекти – политичарите. Покрај размислувањата за историската генеза на всадувањето на митовите во битисувањето на човекот, Габер посебен акцент става на нивната улога во градењето на поголема компактност на човековите заедници (од семејството, преку групата, народот и нацијата). Оттука, авторот особено се посветува на значајното влијание на митовите во создавањето на психо-културните основи за формирање на една држава, каква што ја познаваме во Новиов век.
Основна интенција на оваа книга – на што е посветен и и најголем дел од текстот – е да се расветли употребата на митовите од страна на политичкиот фактор, со неизбежната нивна злоупотреба за дневно-политички цели, и со нивна „помош“, за стекнување на моќ и девијации меѓу прокламираното и оствареното од страна политичките елити.
Габер се концентрира и на употребата на митот и во оној симболички простор на дискрепанцата меѓу јавните политички прокламации за изградба на демократско, граѓанско општество и реалните можности и остварувања на тие ветувања, за да упати на потреба од поширока, безусловна имплементација на тие цивилизациски вредности за доброто на човекот.
извор: МИА
