Министерот за здравство Венко Филипче уверува дека ниту една вакцина не е фрлена од почетокот на вакцинацијата, иако на закажаните термини во просек не се јавуват околу 20 отсто од лицата.
-Тоа што се прави е да се планира уште колку луѓе се закажани, се отвара помала количина на крај на работниот ден, не само во салата Борис Трајковски туку и во пунктовите и така се аплицираат вакцините. Значи ниту една вакцина не останува неискористена или фрлена, вели Филипче на новинарско прашање по посетата на салата „Борис Трајковски“ каде тече имунизацијата согласно планот.
Во однос на динамиката на вакцинацијата, посочи дека ќе се прилагодува согласно расположливоста на вакцините, а според поставеноста на системот може да дојде и до 10 000 вакцинации на ден. Очекува да продолжи интересот кај повозрасните за вакцинација, а најголемиот притисок од сите останати се очекува пред летните одмори.
-Ова е план што го направивме за да означи почеток на процесот на имунузација и започнавме со некаде околу 700 до 800 термини во текот на денот, без салата Борис Трајковски, а сега во тие пунктови се одвива вакцинација со околу 1500 на ден. И тоа се пунктовите низ државата, се уште со можност термините да се згуснат и бројот на вакцини да се зголеми. Тука во салата Борис Трајковски нешто помалку од вообичаените 2500 на ден, поради тоа што очекуваме постари лица исто како и во пунктовите, кои почесто доаѓаат со придружба итн. Така да во смисла на динамика согласно расположивоста со вакцините, сега како што е поставен системот може да се постигне за многу кратко време, веднаш кога ќе бидат вакцините на располагање динамика од 7-10 000 вакцинации на ден, дополнително на ова во местата на вакцинација ширум државата. Тоа што ние очекуваме, какви се нашите предвидувања – сега има интерес и така треба да биде, и се надевам дека ќе биде се поголем за пријавување од постарите лица. Некаде пред летните месеци и притисокот од сите останати кои сакаат да патуваат, меѓутоа согласно оваа динамика на пристигнување на вакцините, мислам дека тоа ќе биде на задоволително темпо, рече министерот Филипче.
извор: МИА
