ЦИВИЛ ја изразува својата загриженост околу содржините коишто се објавени на инстаграм профилот „Најлудите школски видеа“. Последните вести за однесувањето на учениците во училиштата ширум земјата мора да се сфатат крајно сериозно и институциите веднаш да реагираат соодветно на законските одредби. Потребна е итна истрага за мотивите и заднината на оваа серија инциденти.
Бараме итно да се пронајдат администраторите на овој профил, како и сите учесници во инцидентите што се снимени и објавени на социјалните мрежи.
Истовремено, ги повикуваме директорите на училиштата, педагозите, психолозите и стручните служби, како и советите на родителите, итно да преземат сериозни активности, вклучувајќи формирање работни групи кои ќе понудат итни и ефикасни решенија да се надмине оваа немила појава. Тоа подразбира и преземање решителни и остри дисциплински мерки за сите инволвирани, но и поведување истрага и законски санкции за сите што овие инциденти ги овозможиле, мотивирале или не реагирале соодветно на своите надлежности.
Ги повикуваме родителите сериозно да се ангажираат, да соработуваат со стручните служби и со надлежните институции како што се полицијата и јавното обвинителство и да се вклучат во решавањето на овој проблем.
Исто така, ги повикуваме Министерството за образование и Државниот просветен инспекторат итно да се вклучат во справувањето со оваа закана.
Загрижува и фактот што на дел од видеата каде се гледа недоличното однесување на учениците се присутни и претставници на наставниот кадар. Оваа тортура на соученици и професори мора да престане, а инволвираните да сносат целосна одговорност. Не смееме да останеме неми пред ваквото дивјачко однесување, велат од ЦИВИЛ.
Имено, деновиве се појави текст на fakulteti.mk кој пишува: Македонски ученици палат клупи, ги фрлаат низ прозорец, кршат врати, пушат, се снимаат и постираат на Инстаграм.
„Најлудите Школски Видеа. Доколку сакате и вашето видео да биде објавено, пратете ми го. Придружи ѝ се на армијата од 15.000 Багабонти“, пишува во описот на групата.
Инстаграм-групата „Најлудите школски видеа“ (Crazy.school.videos.mk“) беше избришана во текот на вчерашниот ден, најверојатно од самите админи по објавувањето на нашата сторија. Засега не е познато во кои училишта во Македонија се случувал вандализмот, но од Министерството за внатрешни работи ни изјавија дека од вчера Секторот за компјутерски криминал и дигитална форензика постапува по овој случај.
