За помалку од пет месеци од почетокот на првите кампањи за масовна вакцинација, во декември 2020 година, ширум светот се употребени повеќе од милијарда дози вакцина против коронавирусот, преметаа француските медиуми.
Најмалку 1.002.938.540 дози се потрошени во 207 земји и територии на светот, според пресметката заснована на официјални извори.
Повеќе од половината од вкупната бројка (58 проценти) е потрошен во три земји: САД (225,6 милиони), Кина (216,1 милиони) и Индија (138,4 милиони). Но, во однос на популацијата, најуспешен е Израел, каде речиси 60 проценти од населението ги примило двете дози на вакцината.
Следат Велика Британија (49 проценти добија барем по една доза), Обединетите Арапски Емирати (повеќе од 51 процент), САД (42 проценти), Чиле (41 процент), Бахреин (38 проценти) и Уругвај ( 32 проценти).
Во Европската унија, 128 милиони дози примиле 21 процент од населението. Најгусто населените земји во Европската унија имаат европски просек – Франција 20,5 проценти, Германија 22,6 проценти, Италија 19,9 проценти и Шпанија 22,3 проценти, далеку зад Малта (47 проценти) и Унгарија (37 проценти).
Иако на 25 март, по четири месеци од почетокот на кампањите, беше употребена 500-милионитата доза, требаше помалку од еден месец за оваа бројка да се удвои.
Иако повеќето сиромашни земји почнаа со вакцинирање, најмногу благодарение на механизмот Ковакс (СЗО, Гави Алијансата и Коалицијата Цепи), Светската банка смета дека вакцинацијата е привилегија само на земјите со „високи доходи“, затоа што во нив живеат 16 проценти од човештвото, но добија 47 проценти од дозите употребени ширум светот.
Земјите со „ниски доходи“ досега добиле само 0,2 проценти од дозите.
Дванаесет земји од светот се уште не почнале со вакцинација – седум африкански (Танзанија, Мадагаскар, Буркина Фасо, Чад, Бурунди, Централноафриканска Република, Еритреја), три во Океанија (Вануату, Самоа, Кирибати), една во Азија (Северна Кореја) и една во Карибите (Хаити).
Вакцината „АстраЗенека“ и покрај полемиките, е најшироко употребена во светот и се користи во три четвртини од земјите и териториите кои спроведуваат кампањи за вакцинација (најмалку 156 од 207, или 75 проценти).
Таа е пред „Фајзер“/ „БиоНТек“ (во 91 земја или 44 проценти), „Модерна“ (во 46 земји или 22 проценти), „Синофарм“ (во 41 земја и територија или 20 проценти), „Спутник В“ (во 32 земји или 15 проценти) и „Синовик“ (во 21 земја или 10 проценти).
