Владина делегација во состав од премиерот Зоран Заев и вицепремиерите Никола Димитров и Фатмир Битиќи е во посета на Република Грција. Времето поминато кај јужниот сосед, владините претставници го поминуваат продуктивно и со набиена агенда – учество на економскиот форум Делфи, тет-а-тет средба со поранешниот британски премиер Тони Блер, состанок со претставници на атинската берза и други активности.
Во посета на главниот грчки град, премиерот отпатува по посетата на Мадрид, што претставуваше прва официјална посета на шпанската престолнина на највисоко, премиерско ниво од независноста на македонската држава до денес.
Брисел, Мадрид, Атина, тоа се европските метрополи низ кои гордо се вееше македонското знаме изминатата недела, а токму интензивирањето на активностите на македонската дипломатија пред јунските собири на челниците на Европската Унија испраќа важна порака.
Можноста за конечно отпочнување на претпристапните преговори со ЕУ и ефектуирањето на позитивната препорака, повторно се главна тема на разговорите на македонските делегации со делегациите на земјите членки. Нашата агилност, преку Владата, но најмногу преку Министерството за надворешни работи и Секретаријатот за европски прашања како најповикани е за поздравување и треба да продолжи со уште позасилено темпо. Како држава имаме многу пријатели помеѓу оние држави кои ја заокружуваат бројката 27 како членство на Унијата и тие пријателства, кои живот значат, мораме максимално да ги ползуваме.
Потенцирањето дека отпочнувањето на преговорите ќе даде силен ветeр во грб за нужната европеизација и уште поважното реформирање на македонското општество е главната порака која нашите дипломати се трудат да ја испратат. Ова, проследено со фактот дека почетокот на преговорите претпоставува долг иден процес на отворање на поглавјата и усогласување со нив, не и инстант членство, ова дополнето и со можноста за реверзибилност на самиот процес, укажува дека освен нелогичните барања од источниот сосед, друга препрека на македонско-европскиот пат не постои.
Во таа насока, особено интересни се и изјавите кои доаѓаат од Грција и од маргините на економскиот форум Делфи. Од една од сесиите на форумот, со присуство на кипарскиот МНР, Христодулидес и грчкиот заменик МНР, Варвициотис, произлегоа заклучоците дека Северна Македонија и Албанија треба да останат заеднички во фокусот на Унијата и дека нивното чекорење кон Брисел, не треба и не смее да биде раздвоено.
Оттука, знаејќи го нивото на дипломатските односи помеѓу нас и јужниот сосед пред Договорот од Преспа од 2018 година и „научната фантастика“, грчки државник да излезе со јавна поддршка за евроинтеграции, не смееме, а да не ги акцентираме моментумот и важноста на силните и охрабрувачки пораки од новите пријатели, а со кои до неодамна водевме дипломатска битка. Знаејќи ја испреплетеноста на грчката и кипарската дипломатија и ветувачките зборови кои доаѓаат од овие две ЕУ земји членки, очигледна е подобрената клима и затоплувањето на нашите и нивните надворешни односи.
Сето ова уште еднаш ги истакнува предностите на изразената и активна македонска дипломатија, ама ја подвлекува и огромната неопходност од дипломати од кариера, од дипломати од еден „нов ков“, македонски претставници кои ќе хараат низ светот со харизма, ама и знаење и сенс за геополитичките движења, реал политиката и промоцијата и одбраната на тезата дека и сонцето е ѕвезда и дека во Европа може да припаѓаме и вредносно, а не само географски.
Иван Дургутов
