Министерот за надворешни работи Бујар Османи денеска се сретна со млади аналитичари од различни тинк-тенкови и организации во земјава со цел размена на мислења и отворање дискусија за улогата на младите во изработката и имплементацијата на Стратегијата за надворешна политика.
Како што соопшти МНР, средбата е во рамки на проектот „Рефлексија 2030“ и со тоа официјално почна реализација на првиот столб на „Рефлексија 2030“ или широките граѓански консултации со заинтересираната јавност.
-Денешниот настан е првиот во серијата настани после инаугурацијата на Стратешкиот совет за надворешна политика, што само по себе зборува за важноста што ја придаваме на сегментот млади истражувачи и на амбицијата за нивно засилено вклучување во процесите на креирање на политики и носење на одлуки, истакна министерот Османи. Додаде дека придонесот на младите од тинк-тенк заедницата ќе биде од огромно значење во утврдување на приоритетните цели на Стратегијата и нивната реализација.
-Визијата на вашата генерација за тоа каде и какво општество сакате да видите во наредните 10 години, а пред се, вашето експертско поимање на одделните политики на ЕУ, но и софистицираните процеси и динамики на мултилатерализмот, ќе ни помогнат во исцртување на различните сегменти во Стратегијата, нагласи Османи.
Претставниците на тинк-тенк заедницата, како што се наведува, ја поздравија иницијативата „Рефлексија 2030“, преземајќи обврска да одговорат со широк придонес во рамки на создавањето на десетгодишната стратегија. Тие изразија благодарност за интересот за вклучување на новите генерации во утврдувањето и реализацијата на приоритетните цели на Стратегијата за надворешна политика со цел зајакнување на позицијата на државата како одговорен и активен чинител во меѓународните односи.
Покрај министерот Османи, на денешниот граѓански состанок присуствуваа и дел од членовите на Стратешкиот совет, чија улога и експертиза кореспондира со младинските политики и воопшто улогата на младите во политиката.
извор: МИА
