Над 65 % од селските водоводи во тетовскиот регион се со микробиолошка неисправна вода, покажуваат податоците на Центарот за јавно здравје Тетово, институција која ја испитува исправноста на водата за пиење. Ваквата состојба е подолг период, но сè уште нема никој преземено соодветно мерки.
„Сето тоа се должи на нивното неодржување, односно не се заштитуваат зоните околу извориштата и резервоарите, не се одржуваат каптажите и не се врши дезинфекција.Тие резервоари можеби над 50 % ги одржуваат месните заедници, има некаде каде има оформено јавно претпријатие самата општина, но дел од месните заедници не ги даваат водоснабдителните системи затоа што како што велат самите ги граделе, а таму каде што стопанисува комунално претпријатие помалку има вакви загадувања, најчесто се работи за Ешерихија Коли“, истакна д-р Ратко Давидовски специјалист по хигиена и здравствена екологија.
Поради микробиолошката неисправност во тетовско често се јавуваат труења со дијареа и повраќање.
И вчера во тетовска Брвеница се појавија случаи на труења на мештаните. Првичните сомнежи се дека се работи за неисправна вода за пиење, земени се мостри од водата и се очекува дека утре ќе бидат готови.
Градоначалникот на Општина Брвеница излезе со соопштение.
„Ние препорачавме да не се пие водата се додека не се добијат резултатите. Не знаеме од каде е труењето ги чекаме резултатите, ќе видиме. Ние имавме дефект на пумпата од водоснабдителниот систем, така се снабдуваме со вода со бушотини затоа што немаме извори, но од Центарот за јавно здравје Тетово не информираа дека системот редовно се одржувал“, соопшти градоначалникот на Општина Брвеница Енвер Пајазити.
Во Тетово микробиолошки водата е исправна за пиење, но има периоди како деновиве, кога има појави на заматеност на водата.
„Водата е заматена од неа тече песок и кал, ова е честа појава, а никој не не информирал кога треба да ја користиме водата, а кога не треба“, истакна една жителка на Тетово.
Д-р Давидовски вели дека проблемот е во старата и дотраена градска водоводна мрежа каде често се појавуаат дефекти, а по остранувањето на дефектите треба да помине извесен период водата да се разбистри и истата може да се користи.
Градската водоводна мрежа во Тетово е стара речиси еден век каде често се појавуваат дефекти кои некогаш знаат да траат со денови, а граѓаните да останат без вода за пиење, на и со заматена вода.
Зоран Димовски
