На 9 август, Врховниот суд на Белорусија пресудил да се затвори Белорускиот ПЕН центар. ИФЕКС, глобалната мрежа за одбрана и промоција на слободата на изразување, информираше за реакцијата на Меѓународниот ПЕН центар, асоцијација на организации на писатели од над сто земји низ целиот свет.
Како реакција на веста, Џенифер Клемент, претседателка на Меѓународниот ПЕН центар, побара да се преиначи одлуката:
„Заедницата на ПЕН остро го осудува затворањето на Белорускиот ПЕН центар. Тоа што белоруските власти го затвориле Белорускиот ПЕН центар на годишницата од оспорените претседателски избори претставува трагично потсетување на илјадниците нарушувања на човековите права со кои се соочува храбриот народ на Белорусија во последните месеци, како и нивната решеност да се справат со лошата ситуација. Заедницата на ПЕН искажува поддршка за Белорускиот ПЕН центар и сите граѓани на Белорусија кои неуморно продолжуваат да се борат за своите права. Ги повикуваме белоруските власти веднаш да ја преиначат одлуката за укинување на Белорускиот ПЕН центар, како и под итно да ги почитуваат правата на слобода на изразување, слобода на здружување и мирен собир.“
Белоруските власти започнаа брутална пресметка со опозицијата, граѓанското општество и независните медиуми по оспорените претседателски избори кои се одржаа на 9 август 2020 година.
Според официјалните резултати, со тие избори Александар Лукашенко по шести пат се врати на функцијата претседател на Белорусија. Од тогаш, властите имаат затворено над 35.000 луѓе од кои стотици се подложени на мачење и малтретирање.
Европската Унија смета дека тогаш беше извршена изборна измама и воведено санкции против режимот на Лукашенко.
Од јули 2021 година, белоруските власти ја ескалираа кампањата на брутални напади против независните медиуми и граѓанското општество, приведувајќи десетици новинари и затворајќи над 100 организации за човекови права и други граѓански организации, меѓу кои и Белорускиот ПЕН центар.
Белорускиот ПЕН центар е основан 1989 година и е примен за членка на Меѓународниот ПЕН во мај 1990 година на 55-тиот меѓународен конкрес на ПЕН, одржан во Мадеира, Португалија.
Во изјавата објаавена на 10 август 2021 г., членовите на Белорускиот ПЕН центар посочуваат дека „се гордееме со нашата работа, нашите пријатели, партнери и волонтери“.
Меѓународниот ПЕН упати повик до белоруските власти под итно да ја прекинат кампањата против слободите на изразување, здружување и мирно собирање, барајќи безусловно ослободување на сите граѓани на Белорусија кои се затворени за искажување на сопствените мислења, како и прекин на пресметката со граѓанското општество.
извор: МЕТА
