Критиката на Арнолд Шварценегер кон противниците на носењето маски го чинеше загуба на голем корпоративен спонзор на претстојниот натпревар во бодибилдинг – „Арнолд класик“. Настанот е закажан за следниот месец, во Охајо (САД).
Глумецот и поранешен гувернер на Калифорнија претходно зборуваше за сериозноста на пандемијата во интервју за Си-Ен-Ен па луѓето што одбиваат да носат маски ги нарече глупави. Тој, притоа, додаде: „По ѓаволите со вашата слобода“.
Компанијата за спортска опрема, „Редкон 1“ кусо потоа објави дека веќе нема да го спонзорира натпреварот за бодибилдинг на Шварценегер поради „опасните и антиамерикански“ забелешки на глумецот.
„Со голема тага објавуваме дека Редкон 1 одлучи да ја прекине секоја поддршка за ’Арнолд класик‘ и други настани поврзани со Арнолд низ целиот свет“, напиша основачот на фирмата, Арон Сингерман, на Инстаграм.
„Редкон 1“ го спонзорираше „Арнолд класик“ речиси десет години, Сингерман рече дека неговата компанија е „патриотски бренд“ што поддржува „слобода на избор“.
– Секој што вели „По ѓаволите со вашата слобода“ – не е американски патриот!, нагласи Сингерман.
