Наставниците се најважната алка во воспитно-образовниот процес, тие се носителите на промените за поквалитетно образование, коишто од први септември започнаа во прво и во четврто одделение. Реформата ја правиме заедно, мислењето на наставниците го слушнавме кога ја подготвуваме новата Концепција за основно образование и во неа ги вградивме долгогодишните барања за слобода во организирање на часот и користење на наставни методи и пристапи кои обезбедуваат квалитетна интеракција со учениците. Затоа што наставниците најдобро знаат како на учениците да им овозможат на едноставен и ефективен начин да стекнуваат знаења и вештини, да ги откриваат и развиваат сопствените потенцијали за да можат подоцна успешно да се соочуваат со предизвиците, рече министерката за образование и наука Мила Царовска на доделувањето признанија на просветните работници по повод Меѓународниот ден на просветните работници, 5 Октомври.
Министерката нагласи дека просветните работници и во услови на пандемија покажаа како со многу труд, желба и истрајност може за кусо време да се трансформира целиот систем на образование и да се одржи континуитет на настава, соодветно на можностите и потребите на учениците – преку онлајн настава, снимени видео лекции или печатени материјали.
„Како наставници одржавте лекција на целата наша заедница – колку сте значаен општествен чинител, но со години маргинализиран и воопшто неценет. И тоа ми е уште поголем мотив како министерка за образование и наука да продолжам да се борам за унапредување на достоинството на професијата наставник и секој што одбрал да биде учител на нашите деца, да го добие местото кое го заслужува“, посочи Царовска.
Платите на наставниците во последните 4 години се зголемени за над 4.000 денари кај наставниците со над 10 години стаж. Осврнувајќи се на достоинственото вреднување на трудот на наставниците, министерката појасни дека затоа е изготвен нов Закон за наставници и стручни соработници, со кој се обезбедува континуиран раст на платите, согласно зголемувањето на минималната плата во државата, чиешто носење опозицијата го опструира.
„Оваа Влада и јас како министерка решени сме никогаш повеќе наставниците да не бидат партиски заложници ниту пак како порано, одлуката за нивно вработување да биде политички темпирана“, потенцираше Царовска.
За вонредно ангажирање и придонес во унапредувањето на воспитно-образовната дејност, признанија и плакети добија 11 просветни работници. Честитајќи им за високото признание, министерката Царовска рече дека тоа треба да биде поттик за сите наставници да се вложат максимално и да придонесат за создавање на подобар и поквалитетен образовен систем, а нивниот труд и посветеност нема да останат незабележани.
