Судијата Огнен Ставрев даде пауза од 15 минути на судењето во случајот „ТНТ” за уривањето на комплексот Космос на инвеститорот Фијат Цановски, со цел Судот да одлучи по барањето на Обвинителството за раздвојување на постапката, откако на денешното рочиште не се појави еден од обвинетите Тони Трајковски.
Ставрев, на почетокот рече дека денеска во 9 часот, пред почеток на денешното рочиште добил известување дека обвинетиот Тони Трајковски е хоспитализиран на Клиника за неврохирургија, за што до Судот ќе биде доставена и дополнителна документација.
Бранителот на Трајковски, адвокат Јовица Страшевски рече дека состојбата на неговиот клиент е многу лоша и дека тој е неконтактибилен и повраќа.
Адвокатот Мерџан Даути, побара постапката да не продолжува со денешниот состав.
– На Лилјана Ивановска Кочоска и престанува функцијата судија поротник. Би сакал да не се продолжува со овој состав, бидејќи ќе се направи суштествено прекршување на постапката, изјави Даути.
За судија поротник Марија Кондовска, исто така, посочи адвокатот Датути дека има доставено поднесок, за тоа што навршува 60 години и и престанува функцијата по сила на закон.
Обвинителот Бурим Рустеми рече дека функцијата судија поротник не престанува автоматски и оти смета дека може да се продолжи по барање.
– Во однос на новонастанатата ситуација сметам дека се исполнети услови за раздвојување на постапката за обвинетите Тони Трајковски и членовите на комисијата, со кои заедно ги сториле прекршувањата. Апсурдно би било да не се раздвои постапката и да се врати на почеток, кога истата се наоѓа во сосема крајна фаза и обвинетиот Миле Јанакиевски веќе има дадено исказ пред Судот, рече Рустеми.
Адвокатот Дончо Наков бараше објаснување од сите судии зошто одеднаш оваа постапка се става во десетта брзина.
– Имам поднесок и барам да се каже зошто се одложени сите други судења и одеднаш само едно судење е битно, рече Наков.
Тој, исто така, реагираше дека не бил присутен само на едно рочиште за ова судење и бил казнет, додека судењето во две години било десет пати одложено поради Обвинителството или Судот и никој за тоа не е казнет.
Адвокатот Еленко Миланов рече дека оваа постапка не може да продолжи поради истек на мандат на судија поротник Лилјана Ивановска Кочоска .
– Мандатот за кој сте избрани е четири години. Вашиот мандат за жал истече на 24 декември 2019 година. Доколку се впушти во одлучување со тоа се изложува на опасност и нејзина е одлуката дали ќе одлучува и по истекот на мандатот, изјави Миланов.
Сметам дека раздвојувањето со правната формулација што ја имате во моментот не може да ја направите за мојот клиент Миле Јанакиески.
– Не може да има пресуда за поттикнување или помагање на дело без пресуда за сторителот, изјави Миланов.
