Кочани ја има најдобрата понуда за одржлив развој, а со реализираните капитални проекти обезбедивме огромна предност пред противникот, кажа кандидатот за градоначалник од СДСМ, Николчо Илиев на партиската трибина во градот.
-Изградивме над 60 улици, нова градинка, планинарски дом, мултикултурен центар и финансиски чесно и одговорно ја водевме општината. Затоа ќе ја добиеме поддршката за да продолжиме со решавање на проблемите, рече Илиев.
Тој најави дека подеднакво ќе вложува во градот и околните населени места, затоа што силни села значат и силна општина, а воедно додаде дека општината ќе продолжи да испорачува редовни социјални услуги и да вложува во спортот, здравјето и културата.
-Изградивме градинка, но сега ќе градиме дом за стари лица. Досега вложивме три милиони евра во туризмот, а сега ќе градиме ски центар на Царев врв. Проектираме во градот и катна гаража, мост, нови патеки, нагласи Илиев.
Покажавме што значи градежна инвазија, истакна кандидатот за градоначалник на Кочани, Николчо Илиев на трибината на СДСМ во градот. Тој кажа дека е горд што Кочани е првата општина што успеала да се раздолжи и сега е во ликвидна состојба.
-Нашите противници ги испарија парите на граѓаните, но треба да одговорат зошто вреќата цемент ја плаќале 600 денари, а чини триста денари. Ништо не им е поважно од личниот интерес, кажа Илиев.
Кандидатот на СДСМ вели дека 80% од веќе реализираните проекти не биле дел програмата, а голем дел од нив, меѓу кои и патот Кочани-Пониква, но и други, биле реазлизирани со помош на централната власт.
-Анкетите покажуваат победа и победуваме во првиот круг, заклучи Илиев.
