Премиерот Зоран Заев не очекува инфлацијата да надмине три отсто до крајот на годинава и вели дека државата е целосно подготвена за стабилизирање на цените од енергетскиот шок кој се случува во Европа.
– Инфлацијата не очекуваме да биде поголема од три проценти, а според последните податоци кои ги имаме е 2,8 проценти. Не очекуваме зголемена инфлација ни за годинава, ниту за годините што следат до 2026-та. Курсот на денарот е стабилен има и стабилни цени. Меѓународниот пазар има влијание врз цените на некои од производите, како што беше со маслото за јадење чија цена се зголеми пред шест месеци насекаде, или цените на нафтените деривати и во моментов на природниот гас и на електричната енергија на берзите. Тоа не зависи никако од нас, но државата е целосно подготвена за стабилизирање на цените од енергетскиот шок кој се случува во Европа, рече Заев во одговор на новинарско прашање на денешната прес-конференција во Владата на која беше најавен Планот за за забрзан економски развој 2022 – 2026 година и додаде дека имаат капацитети, средства и алатки за да се справат со тоа.
Тоа, како што рече, само по себе е најголем показател за стабилната економска состојба и финансиските капацитети кои ги има државата за да им биде на располагање на граѓаните, приватните и правните субјекти во земјава.
– Средствата кои се планираат за Планот за забрзан економски развој 2022 – 2026 година нема да се само од кредити, туку и од сопствени средства. Колку земаме кредити толку враќаме, а во иднина, имајќи предвид дека таргетираме дефицит од 2,2 процента, а сега имаме 6,5 проценти, тоа значи дека помалку ќе земаме кредити, а повеќе ќе враќаме. Менаџментот со јавните финансии и акцелераторската можност за поттикнување на домашните и странските инвестиции се најголема потврда за солидната економска состојба во државата и дека сме на добар пат, потенцира Заев.
Како земја членка на НАТО, посочи премиерот, се надевам дека во 2022 година и со отворени поглавја и кластери со ЕУ, пријатели со соседите и добри односи дома и во регионот, сето тоа ќе даде дополнителен ветер во грб на забрзаниот економски раст.
Најави дека најголемите инвестиции што ќе се реализираат во следните четири години ќе бидат од областа на енергетиката и ја напомена веќе објавената германска инвестиција на ВПД во износ од 500 милиони евра за изградба на ветерен парк во Свети Николе.
Тој посочи и бројни инвестиции во фотоволтаични и ветерни електрани во приватна и државна сопственост во вредност од повеќе стотици милиони евра, 300 милиони евра за гасификација на градовите ширум државата, изградба на топловоден систем во Битола во вредност од 30 милиони евра, реконстуркција на ТЕЦ Неготино, изградба на повеќе автопатишта, експресни и локални патишта и железнички линии, водоводни и канализациски мрежи, прочистителни станици, депонии.
извор: МИА
