пишува: БЕСА АРИФИ
Слободата прави човекот да биде човек а не роб. Слободата му дава значење на животот. Да се биде слободен значи да можеш сам да одлучуваш за својата судбина, да изразиш своја мисла и да не бидеш прогонет за тоа. Да бидеш слободен значи да бидеш одговорен за своите дејствија. Слободата е најдрагоцената вредност, бидејќи без слобода животот е залуден.
Човекот се навикнува на слобода и добива впечаток дека отсекогаш бил слободен. Човекот ја потценува слободата, дури и кога истата ја добил со голем труд. Човекот брзо заборава како е да се живее во ропство. Човекот ја зема слободата здраво за готово, ја запоставува, и многу брзо е спремен повторно да ја изгуби.
После само неколку години забораваме дека до скоро живеевме во заробена држава. За таква ја оценија Северна Македонија најрелевантните меѓународни извештаи само неколку години порано. Токму тие извештаи сега го фалат напредокот во ова држава, ја фалат нејзината прозападна и демократска ориентација. Токму тие извештаи го издигнуваат во пиедестал како најголемо достигнување Договорот од Преспа како најбитен чекор напред во поновата историја на ова држава.
А сепак, ние сме спремни да ги вратиме на власт тие од чие ропство едвај се спасивме. Колку брзо забораваме како беше да не бидеш слободен да го кажеш тоа што го мислиш, да не можеш слободно да ја критикуваш неправедната власт, да немаш никаква западно-ориентирана перспектива, да не можеш слободно да живееш. Колку брзо човекот е спремен да заборави сé, да се врати таму каде што беше порано, и повторно да се занимава со веќе апсолвирани теми. Колку чудно е да очекуваш дека една нереформирана партија со почесен претседател бегалец во Унгарија ќе направи промена и ќе овозможи подобар живот за сите. Колку неспремни се однесуваме да ја зачуваме мачно заработената слобода.
Без разлика со колкав труд била освоена, слободата многу брзо може да се изгуби. За жал, слободата се освојува многу тешко а се губи за еден миг. За жал регресот е многу полесен од прогресот. Превртувањето во бездна е несразмерно полесно од напорот да се излезе од таму.
Слободата треба да се заслужи. Ако не ја заслужуваме, брзо ќе ја изгубиме.
Текстот е личен став на авторот. Сите права се задржана
