Андреј Ал-Асади
Мудра и соблазителна
Тркалаш костени
Со палците ножни
Преку ридови и лединки
Го абеш векот свој
Чекаш реката да ти одговори
Зошто налево го чешла
Мустаќот на сомот
Кој нејзините темни вилаети
Под заклетва ги чува
Во калта
Свежи цреши бараш
Паднати
И со јачменот се кикотиш
Ко со брат роден
Затоа што веруваш
Во некој друг Бог
Секогаш пресен
Кој подучува
Како чемерот стамен
Врз туѓи плешки се остава
Кои штом напукнат
Под товарот гнасен
Последниот здив станува песна
И тебе те сторува вечна.
Андреј Ал-Асади е роден во Лондон, 1996 година. Има дипломирано на Економскиот Факултет при Универзитет „Св. Кирил и Методиј“ во Скопје. Беше еден од петте номинирани поети за наградата “Браќа Миладиновци” во склоп на СВП за 2020 година.
избор: Тања Кармзова Костиглиола
