Оваа година за прв пат ќе се доделува државната награда за човекови права „Мето Јовановски”. Редакцијата на Фронтлајн неофицијално дознава дека добитници на овогодинешната награда „Мето Јовановски”, се Ѓорѓи Лазаревски и Звонко Костовски.
Лазаревски и Костовски, се вработените во УБК кои го открија скандалот со прислушувањето.
Објавувањето на дел од прислушуваните разговори во 2015 година резултираше со нови избори во 2016 и формирање нова влада во 2017 година. Разговорите беа докази за обвиненија на 94 лица и седум компании.
Наградата за човекови права „Мето Јовановски”, ќе се додели на Меѓународниот ден на човековите права, 10 декември.
Собранието на Северна Македонија во јули 2021 година ја именуваше за претседател на Одборот за наградата „Мето Јовановски“, извршната директорка на Хелсиншкиот комитет за човекови права, Уранија Пировска. Членови на Одборот се извршната директорка на Фондацијата Отворено општество Македонија, Фани Каранфилова – Пановска, претседателот на НВО Асоцијација за демократски иницијативи (АДИ) од Гостивар, Алберт Муслиу, претседателката на Институтот за човекови права и поранешната судијка на Европскиот суд за човекови права, Маргарита Цаца Николовска, извршната директорка на Колаицијата „Маргини“, Ирена Цветковиќ, извршната директорка на Националната мрежа против насилство врз жените и семејно наслиство – Глас против насилство, Елена Димушевска, Несиме Салиоска, претставничка на организацијата за заштита на правата на Ромите, Звонко Шаврески од Полио Плус, Бојан Јовановски, извршен директор на ХЕРА, Ана Чоловиќ Лешоска од Еко – свест, Кристина Ампева од Зружение Гласен Текстилец и Бардил Јашари од Фондација „Метаморфозис“.
Ѓорѓи Лазаревски и Звонко Костовски во 2018 година ја добија „Наградата за слобода на говорот“ на Коалицијата за заштита на свиркачите во Југоисточна Европа и Европскиот центар за заштита на правата на свиркачите.
Ј. Ѓ.
