Социјалдемократите на 12 декември ќе го бираат наследниот на Зоран Зоран на кормилото на партијата меѓу тројца кандидати: Димитар Ковачевски, Фросина Ременски и Јован Деспотовски. Својата кандидатура за лидер на СДСМ ја најави и поранешниот организациски секретар Миле Зечевиќ. но ја повлече.
-Станува збор за процес на непосредни избори кои за првпат се случуваат кај нас и покажува колку силен демократски капацитет има партијата. Би сугерирал да има повеќе време за кампања, да можат кандидатите да се претстават пред членовите и симпатизерите на партијата. Сепак се три кандидати, кои се долгогодишни и искусни партиски членови, рече Зечевиќ во гостувањето на Утрински брифинг.
-Кога се качуваме накај планината забораваме на оние кои што тргнале со нас по патот додека стигнеме до врвот. И тоа е едно лошо правило. Најважно е внатрешната организација да ја направиш врз принципи каде што ќе го почитуваш секој поединец и нема да заборавиш кој ти помогнал и на каков начин. Имавме плејада на луѓе кои застанаа зад политиките на СДСМ во 2013 година и претходно се до 2017 година. Кога се презема власта во една тешка и специфична ситуација со два проблеми. Во оперативните капацитети мора да покажете апсолутно нешто што им е потребно на граѓаните. Граѓаните може не ги разбираат клучните придобивки од НАТО и ЕУ. Но ние се компарираме, сакаме квалитетен живот, добри улици, квалитетна храна, да живееме во еден простор кој личи и приличи на европско живеење, рече Зечевиќ.
Според него има клучни моменти и мора да се дефинира јасно и прецизно што треба да се постигне.
– Владините прашања се една работа, но луѓето бараат конкретни дејствија. И ако оперативно не ги ставите во една партиска програма која ќе им се предочи на граѓаните, ќе мора да има и реализација за да може луѓето да видат дека влегувате и работите во нивен интерес. Не можете да одите кај народот и паушално да ветувате, дециден е Зечевиќ.
-И ние и тие, сите живееме во Скопје. Трифун Костовски најави трамвајски превоз, Коце Трајановски ја укина, Шилегов најави бас рапид, Данела Арсовска го укина. Не е спорно дека СДСМ работи, ги креираме политиките, ги дефинираме стратешките правци. Но тешките капитални проекти мора да бидат анализирани и планирани. Делницата Скопје – Охрид не е застаната зошто некој не сака да ја прави, туку зошто е паушално направена. Треба да има сериозна анализа пред да се влезе во реализиација на некој проект, рече Зечевиќ.
На прашањето дали е фер што лидерот на СДСМ Зоран Заев застанал зад еден од кандидатите за нов лидер на партијата, Зечевиќ рече:
-Не е исклучок и во другите политички партии лидерот да го избере својот наследник односно кандидатот за наследник за кој смета дека најмногу ќе придонесе за зачувување на она што значи партиско единство и претпоставувам дека господинот Заев од повеќе аспекти ги оценил и проценил сите идни ситуации и застанал позади кандидатот Димитар Ковачевски, одговори Зечевиќ.
Извор: Утрински брифинг на Слободен печат
