На азиските берзи денеска цените на акциите благо пораснаа бидејќи инвеститорите се повеќе склони кон ризични инвестиции на крајот на годината, но се тргуваа внимателно бидејќи омикрон сојот на коронавирусот продолжува брзо да се шири низ светот.
Азиско-пацифичкиот берзански индекс MSCI, без јапонскиот, порасна за 0,3 отсто околу 7 часот наутро, зајакнувајќи втор ден по ред. На токиската берза индексот Никеи благо ослабна, додека цените на акциите во Шангај, Јужна Кореја, Австралија и Хонг Конг пораснаа меѓу 0,1 и 0,4 отсто.
Растот на индексот втор ден по ред најмногу се должи на корекцијата на цените на акциите откако во понеделникот нагло паднаа, при што азискиот индекс MSCI падна на најниско ниво оваа година.
Но, се тргува со претпазливост бидејќи бројот на луѓе заразени со омикрон, кој е позаразен од претходните варијанти на коронавирус, рапидно расте во светот. Затоа, се повеќе земји повторно воведуваат рестриктивни мерки во пресрет на божиќните празници.
Инвеститорите стравуваат дека новите ограничувања на патувањето, социјалниот живот и бизнисот ќе доведат до забавување на закрепнувањето на економиите од коронавирусот. Поддршка за пазарите, пак, дава вчерашниот силен скок на берзанските индекси на Волстрит, повисок од 1,5 отсто. Ова главно се должи на корекцијата на цените на акциите, откако претходниот ден паднаа за повеќе од 1 отсто поради загриженоста на инвеститорите за ширењето на омикрон.
„Се чини дека инвеститорите одлучија да го игнорираат Омикрон, барем на овој ден“, рече Дејвид Џој, стратег во Ameriprise Financial.
А на валутните пазари вредноста на доларот во однос на кошницата валути порасна. Индексот на доларот, кој ја покажува вредноста на САД во однос на другите шест најважни светски валути, се движи околу 96,52 поени, додека вчера во ова време изнесуваше 96,47 поени.
Бидејќи се очекува американската централна банка да ја заостри монетарната политика побрзо од другите, индексот на доларот зајакна за повеќе од 7 отсто оваа година, што е најдобра година од 2015 година.
Утрово курсот на доларот во однос на јапонската валута порасна од вчерашните 113,65 на 114,10 јени. Американската валута зајакна и во однос на европската, па цената на еврото се лизна на 1,1270 долари, додека вчера во ова време беше 1,1280 долари.
Цените на нафтата, пак, пораснаа втор ден по ред. На лондонскиот пазар цената на барелот порасна за 0,2 отсто на 74,15 долари, додека на американскиот пазар цената на барелот порасна за 0,4 отсто на 71,40 долари.
