Првиот вицепремиер и министер за политички систем и односи меѓу заедниците, Артан Груби денеска оствари средба со амбасадорот на Република Грција во Скопје, Русос Кундурос на која се согласија дека се создадени одлични услови за натамошно унапредување на односите меѓу двете земји, како во областа на енергетиката и економијата, така и во сите други области кои се важни за доброто на граѓаните, информираат од кабинетот на вицепремиерот Груби.
Како што се наведува во соопштението, Груби и Кундурос за време на средбата оцениле дека интеграцијата на Западниот Балкан во Европската Унија е дополнителен придонес за регионалната стабилност и дополнителна можност за имплементација на европските стандарди, а со ова и развојот на целиот регион.
Двајцата соговорници се согласиле дека со потпишувањето на Преспанскиот Договор, отворени се големи можности за развојот на односите меѓу двете земји.
-Грчкиот амбасадор му ја пренесе и силната поддршка од грчката држава во однос на надминувањето на спорот со Република Бугарија и за почетокот на преговорите за членство во Европската Унија. На оваа средба Груби и Кондурос разговараа и за регионалните актуелности, особено за отворените спорови во Западен Балкан, се наведува во соопштението.
Груби и Кундурос на крајот од средбата заклучиле оти Северна Македонија и Грција промовираат стабилност на целиот Западен Балкан преку билатералното пријателство.
извор: МИА
