Фрлањето клетви во древна Атина било вообичаена практика. Ако стравуваш дека некој ќе сведочи против тебе на суд, ако се сомневаш дека некој те измамил или дека има намера да го стори тоа, ако мислиш дека на претстојниот натпревар нема да победиш зашто некој е подобар од тебе или, едноставно, ако љубената не те сака тебе туку сака некој друг, си можел да си најмиш професионален фрлач на клетви, кој без да го споменува твоето име некому ќе му посака лошо. Професионалниот фрлач на клетви, откако ќе изберел соодветна за твојот случај клетва, го врежувал текстот на клетвата на оловна табличка, која потоа ја оставал во гробот на лица кои прерано починале или починале на несреќен начин. Се верувало дека душите на овие лица се најсоодветни за да ги однесат клетвите во подземјето. Вакви оловни таблички со испишани клетви се пронајдени во многу гробници од класичниот период.
Едно скорешно археолошко откритие од античка Атина може да ни даде подобар увид во мрачната практика на фрлање клетви. Неодамна на локалитетот Керамеикос, северозападно од атинскиот Акропол, на дното на еден 2500 години стар бунар, помеѓу останатите артефакти, се пронајдени и околу триесетина оловни таблички со врежани клетви. Она што ги изненадува археолозите е прашањето како овие таблички се нашле во бунар? Одговорот на ова прашање лежи во еден извадок од Кикероновите „Закони“, во кој славниот оратор пишува дека атинскиот владетел Деметриј од Фалерон во времето на своето владеење (317-307 год. пр.н.е.) донел закон за уредување на погребните обичаи. Со него, меѓу другото, на лица што не се во сродство со покојникот им било забрането да присуствуваат на погреби. Со оваа одредба гробовите повеќе не можеле да се користат за црна магија. Но, законот очигледно не ја спречил окултната практика во целост: наместо во гробници, оловните таблички со клетви почнале да се фрлаат во бунари.
Освен што фрлале клетви, старите Грци правеле љубовни и друг вид магии. Ако ве интересира магија, можете да си ја прочитате книгата „Грчки магиски папируси“ прв и втор дел од професорката по класична филологија Даниела Тошева. Оваа книга содржи превод на старогрчки магиски текстови напишани на папирус.
Извор: ΑΡΓΩ
