Кина во моментов е единствениот пријател кој може да и помогне на Русија во ублажувањето на влијанието од економските санкции воведени поради инвазијата на Украина, но нема индикации дека Пекинг е подготвен на такви интервенции што би значеле затворање на американскиот и европскиот пазар за Кина, јави БЕТА пренесувајќи извештај на американската новинска агенција АП.
Дури и да сака, можностите на Пекинг да му помогне на рускиот претседател Владимир Путин се ограничени, стои во извештајот.
Односите меѓу Пекинг и Москва се подобрија од 2012 година кога Си Џинпинг дојде на власт. Блиските односи се мотивирани од заедничката нетолеранција кон Вашингтон, но нивните интереси може да се судрат бидејќи Путин е загрижен за растечкото економско присуство на Кина во Централна Азија и на рускиот далечен исток.
Аналитичарите оценуваат дека односите меѓу Кина и Русија се историски гледано на највисоко ниво, но оти двете земји не се сојузници.
САД, Велика Британија и Европската унија воведоа санкции против претседателот Путин и рускиот министер за надворешни работи, Сергеј Лавров, поради воената инвазија на далеку послабата соседна Украина.
Според АП, Кина би можела да го искористи овој момент во своја полза, но најверојатно нема отворено да се спротивстави на санкциите, за и самата да избегне казни./MИА/.
