Во рускиот воздушен напад на Мариупол се уништени породилиште, болница, како и детски и терапевтски одделенија, ова на Фејсбук го објави шефот на регионалната воена управа на Доњецк, Павло Кириленко, пренесува Укринформ, пишува ЦИВИЛ.
„Мариупол. Директен удар на руските војници во породилиштето. Луѓе, деца се под урнатините. Злосторство! Уште колку светот ќе биде соучесник што го игнорира теророт? Затворете го небото веднаш! Стоп за убиствата! Имате моќ, но се чини дека ја губите човечноста“, напиша Кириленко на Фејсбук.
„Руски пилот, кој веројатно не се срами да се нарече човек, тукушто повторно го притисна чкрапалото, знаејќи точно што ќе удри бомбата. Руси! Вие не само што ја преминавте границата на неприфатливи односи меѓу државите и народите. Ја преминавте границата на хуманоста, престанете да се нарекувате себеси со зборот човек!“ – изјави Кириленко.
