„Последните измени во Законот за извршители воведуваат нови категории, со кои ќе има олеснување во извршувањето, а тоа се социјално загрозените категории. Меѓутоа, како социјално загрозена категорија со новиот закон се сметаат и луѓето што земаат просечна плата. Тоа значи дека тие ќе бидат заштитени во однос на месечните примања од досегашните 1/3 што може извршителите да зафатат, сега ќе зафатат една петина“, изјави за ЦИВИЛ Медиа Зоран Димов, претседател на Комората на извршители како коментар на новите измени во Законот за извршители.
Од една третина до една петтина од плата и пензија се ограничувањата за извршување за лицата приматели на просечна плата и пензија, предвидуваат измените од Закон за извршување кои вчера беа усвоени.
„Видете, во однос на проширувањето на правата, извршителите мора да го почитуваат законот кој содржи императивни одредби во тој однос и затоа сметаме дека кај граѓаните ќе доведе до олеснувачка состојба“, вели Димов од Комората на извршителите.
Колку овие измени се позитивни или негативни за самите извршители Димов не одговори, но позитивна страна на законот е што примената на законските одредби се однесува и за веќе започнатите извршувања како поповолен закон за граѓаните.
Минатиот месец (декември 2019) беше во знакот на протестите против извршување, но и протест на самите извршители, токму кога се отвори прашањето за измени во Законот за извршители.
Граѓаните протестираа да прекине блокирањето на сметките, коко и да има ветинг за извршителите. Извршителите, пак, штрајкуваа незадоволни од новиот тарифник што го предложи тогаш Министерството за правда, а со кој се предвидува намалување на наградата при извршување на парични побарувања од граѓани од 1.000 на 300 евра, сметајќи дека така извршителските канцеларии ќе се доведат во финансиска несолвентност.
Од Министерството за правда информираат дека и двете измени на законот се во насока на градење на концепт на правично извршување и заштита на достоинството на граѓаните.
Б. Јордановска/ЦИВИЛ
