Украинскиот претседател Володимир Зеленски ја пофали „натчовечката сила“ на украинските војници во борбата против руската армија.
– Благодарен сум на сите наши заштитници кои возвраќаат и покажуваат навистина натчовечка сила, рече Зеленски во своето секојдневно видео-обраќање доцна синоќа истакнувајќи дека Украинците се борат „некогашната втора најсилна армија во светот“.
Украинскиот претседател сепак е воздржан од чувство на еуфорија или „прекумерна емоција“.
– Нема потреба да се создава атмосфера на специфичен морален притисок кога се очекуваат одредени победи на неделна, па дури и дневна основа, рече тој.
Зеленски се осврна и на извештаите на военото раководство за враќање под украинска контрола на дел од територијата во близина на градот Харков во источна Украина.
Украинските сили „постепено“ ги протеруваат окупаторите од регионот, рече Зеленски.
– Вооружените сили на Украина прават се за да ја ослободат нашата земја и нашиот народ. Ќе бидат ослободени сите наши градови – Херсон, Мелитопол, Бердјанск, Мариупол и сите други, нагласи украинскиот претседател. /МИА/.
