Владата на премиерот Андреј Пленковиќ има намера да му ги одземе овластувањата на хрватскиот претседател Зоран Милановиќ како врховен командант на вооружените сили, објави „Јутарњи лист“.
Загрепскиот весник наведува дека Министерството за одбрана наскоро на јавна расправа ќе испрати предлог за измени на три клучни закони со кои, меѓу другото, ќе се предвиди армијата во мирно време да ја командува министерот за одбрана и дека претседателот повеќе не може да пензионира генерали.
Предвидено се измени на Законот за одбрана, на Законот за служба во вооружените сили и на Законот за правата од пензиското осигурување на воениот персонал, полициските службеници и овластените службени лица.
Според информациите на „Јутарњи лист“, Владата ќе ги изгласа овие законски измени во текот на есента.
Весникот посочува дека овие предложени измени ќе доведат до нова жестока конфронтација меѓу претседателот Милановиќ, премиерот Пленковиќ и министерот за одбрана Марио Баножиќ.
Во мај Пленковиќ и Баножиќ најавија измени на Законот за одбрана, со што ќе се реши, како што тогаш се наведуваше, „нејасноста на одредени членови“. Според „Јутарњи,лист“ се алудираше на член 70 од Законот за одбрана, со што попрецизно би се дефинирал командата и контролата на вооружените сили и јасно би било наведено дека во мир началникот на Главниот штаб прима наредби и други решенија од министерот за одбрана и е одговорен за нивното спроведување./МИА/
