Милијардерот Илон Маск сугерираше дека тензиите меѓу Кина и Тајван може да се решат со предавање дел од контролата над Тајван на Пекинг, неколку дена откако тој предлагаше можен договор меѓу Русија и Украина за ставање крај на војната, што многумина во Украина го осудија.
Моја препорака … би била да се измисли специјална административна зона за Тајван која е разумно прифатлива, иако веројатно нема да ги усреќи сите, истакна Маск, најбогатиот човек на светот, во интервју за „Фајненшл тајмс“. Маск го кажа ова на прашањето за Кина, каде што неговата компанија за електрични автомобили Тесла работи со голема фабрика во Шангај.
Пекинг, кој тврди дека Тајван е една од кинеските провинции, одамна вети дека ќе го стави под своја контрола и не ја исклучи можноста за употреба на сила со цел да ја постигне целта. Владата на Тајван силно се спротивставува на аспирациите на Кина и вели дека само 23 милиони жители на островската држава можат да одлучат за нејзината иднина.
Можно е, а мислам и веројатно, всушност, тие да постигнат договор кој е поблаг од Хонг Конг, оцени Маск.
Кина му понуди на Тајван модел на автономија „една земја, два система“ сличен на Хонг Конг, но тој беше отфрлен од повеќето политички партии на Тајван и нема поддршка од јавноста, особено откако Пекинг воведе строг закон за национална безбедност во Хонг Конг во 2020 година.
Тајванското Министерство за надворешни работи одби да ги коментира изјавите на Маск, но висок тајвански функционер запознаен со безбедносната ситуација во регионот изјави за Ројтерс дека „Маск треба да најде политички советник со бистра глава“.
