„Дојдено е време кога треба да видиме дали треба да имаме судови и обвинителства каде судиите и обвинителите не знаат што да прават со себе во половина од работното време, додека од друга страна имаме обвинителства и судови кои се преоптоварени со работка. Сите се согласни дека со новата Стратегија за реформи во правосудството мора да се направи ревизија“ изјави пратеничката од СДСМ, Снежана Калеска Ванчева во „Топ тема“ на Телма.
Таа додаде дека со вистинска анализа и ревизија на актуелниот систем ќе може вистински да се зајакнат судовите и обвинителствата за да нема судови или обвинители кои работат премногу, а други кои работат малку, а на крајот да земаат иста плата.
„Постојат објективни и субјективни причини за незадоволството во работата на обвинителството. Требаат повеќе средства, фалат обвинители и истражители. Но, дојдено е време кога мора и објективните и субјективните причини да бидат отстранети“ рече Калеска Ванчева.
Пратеничката кажа дека опозициската ВМРО—ДПМНЕ го блокира новиот Закон за Академијата за судии и јавни обвинители, подготвен од европски експерти со кои се зајакнуваат критериумите за идните судии и јавни обвинители.
Помошта од тимот за санкции од САД не е пораз, туку соработка и помош за институциите, рече Калеска Ванчева.
Не би рекла дека доаѓањето на тимот за санкции од САД е пораз за институциите, туку тоа е знак на соработка и помош и јасен сигнал дека корупцијата не може да се толерира, изјави пратеничката .
Таа додаде дека корупција постои секаде, како што може да се види со најновиот корупциски скандал во Европскиот Парламент, но таму се гледаат брзо и одлучни реакции, нешто што очигледно недостасувало кај нас.
„Дали е тоа поради немање доволно капацитети од објективни или субјективни причини е предмет на анализа, но факт е дека споро се движат работите и честопати немаме вистинска разрешница. Мислам дека ваквата поддршка и помош од нашите вистински пријатиле е поефикасна од само давање пари“ изјави Калеска Ванчева.
Пратеничката кажа дека САД изминатите години има издвоено огромни средства за помош и јакнење на капацитетите на институциите, особено во правосудниот сектор.
